एजेन्सी । ११० वर्षअघि डुबेको टाइटानिक जहाज हेर्न गएका पाँचजना बेपत्ता पर्यटकको मृत्यु भएको छ । पनडुब्बीसहित पाँच जना आइतबारदेखि बेपत्ता भएका थिए।
उनीहरुलाई खोज्न उत्तरी एट्लान्टिक महासागरमा खोज अभियान सुरु गरिएको थियो । तर, हाल उक्त पनडुब्बीमा सवार पाँचै जनाको मृत्यु भएको मिडिया रिपोर्टमा उल्लेख छ ।
पनडुब्बी सञ्चालन गर्ने कम्पनी ओशनगेट र अमेरिकी कोस्ट गार्डले यसको पुष्टि गरेका हुन् ।
मिडिया रिपोर्टका अनुसार आइतबार ओशनगेट कम्पनीको पनडुब्बीमा चढेर पाँच जनाले यो रोमाञ्चक यात्रा गरेका थिए । तर, यात्रा सुरु भएको २ घण्टापछि उक्त पनडुब्बी सम्पर्कविहिन भएको थियो ।
उत्तरी एट्लान्टिक महासागरमा पाँच जनासहित बेपत्ता पनडुब्बीको खोजी अभियान चलाइएको थियो । त्यसबेला विज्ञहरुले पनडुब्बीमा चार दिन मात्रै अक्सिजन रहेको जानकारी दिएका थिए । तर, खोज टोलीले टाइटानिक नजिकै यो पनडुब्बीको भग्नावशेष फेला पारेको छ ।
अमेरिकी कोस्ट गार्डले बिहीबार टाइटानिकको शताब्दीयौं पुरानो भग्नावशेष हेर्न पाँच जनालाई बोकेको पनडुब्बीमा विनाशकारी विस्फोट भएको र त्यसको भग्नावशेष फेला परेको बिहीबार जनाएको छ । सोही क्रममा विस्फोटपछि जहाजमा सवार सबैको मृत्यु भएको बताइएको छ ।
