लण्डन । पासा पुचः गुथि यूकेले शनिबार १३ अप्रिलका दिन ‘लण्डन बिस्का जात्रा’ मनाउँदैछ ।
नेपाली नयाँ वर्ष २०८१ वैशाख १ गते प्लमस्टिडस्थित एसियन कम्युनिटी सेन्टरमा बिस्का जात्रा मनाउन लागिएको हो । जात्राको तयारी सकिन लागेको आयोजकले जनाएको छ ।
जात्रामा बेलायतमै पहिलोपटक लाइभ ढाः बाजामा भैरव नृत्य गराइने तयारी छ भने पशुपतिनाथ मन्दिर प्लमस्टिडको टीमबाट भजनकिर्तन पनि हुनेछ ।
त्यस्तै, नेपाली तथा नेवारी खानाका स्टलहरुका साथै नेवा कला, संस्कृति झल्काउने आर्ट एण्ड कल्चरल हेरिटेज फोटो प्रदर्शनी गरिने योजना छ । आयोजकले शुरुमा अपेक्षा गरेभन्दा पनि झन बढी सहभागी हुने लक्षण देखिएपछि सोहीअनुसार व्यवस्थापन र तयारी झन् व्यापक बनाइएको छ ।
लण्डन बिस्का जात्रामा आयोजक पासा पुचः गुथि यूकेले बेलायतवासी सबै नेपालीहरुको उत्साहजनक सहभागिता रहने अपेक्षा गरेको छ । गुथिका पदाधिकारीहरुले आयोजक नेवा समुदाय रहे पनि जात्रा सबैको साझा रहेको भन्दै सहभागी हुन बेलायतस्थित सिंगो नेपाली समुदायलाई अपिल गरेका छन् ।
जात्रा हेर्न इच्छुकहरुका लागि वयस्कलाई ५ पाउन्ड र ६ वर्ष मुनिकालाई निःशुल्क रहेको आयोजकले जनाएको छ ।
