लण्डन। अर्थमन्त्री प्रकाशशरण महत लण्डन आइपुगेका छन्। मन्त्री महत लण्डनस्थित नेपाली दूतावासले आयोजना गरेको एक उच्चस्तरीय लगानी सम्मेलनमा सहभागी हुन शनिबार साँझ लण्डन आइपुगेका हुन्।
हिथ्रो विमानस्थल टर्मिनल ४ मा उत्रिँदा मन्त्री महतलाई बेलायतका लागि नेपाली राजदूत ज्ञानचन्द्र आचार्य र काँग्रेसको भ्रातृ सङ्गठन नेपाली जनसम्पर्क समिति बेलायतका पदाधिकारीले स्वागत गरेका थिए। मन्त्री महतका साथ नेपाल उद्योग वाणिज्य महासङ्घका अध्यक्ष चन्द्रप्रसाद ढकाल पनि सहभागी छन्।
मंगलबार दिउँसो लण्डन म्यान्सन हाउसमा इमर्जिङ नेपालः अपरचुनिटिज फर इम्प्याक्ट इन्भेस्टमेन्ट एन्ड ट्रेड विषयक सम्मेलन हुँदैछ। बेलायत सरकारसँगको समन्वयमा दूतावासले लगानी सम्मेलन गर्न लागेको हो।
मन्त्री महतले सम्मेलनका क्रममा ब्रिटिस लगानीकर्ता र विकास साझेदार कम्पनीहरूसमक्ष नेपालमा लगानीको वातावरण, कानुनी व्यवस्था, सरकारका प्रस्ताव र लगानीका सम्भावित क्षेत्र आदिबारे प्रस्तुति दिनेछन्।
‘सम्मेलनको मुख्य उद्देश्य नेपालमा बढीभन्दा बढी लगानी भित्र्याउने वातावरण बनाउनु नै हो, मन्त्री महतले भने, ‘गैरआवासीय नेपालीलाई पनि नेपालमा लगानी गर्न अहिले सहज परिस्थिति छ। संविधानले नै आर्थिक, सामाजिक, सांस्कृतिक अधिकार दिएकाले उहाँहरूले अप्ठेरो मान्नु पर्ने अवस्था छैन।’ महतले ब्रिटिस मन्त्रीहरूसँग समेत भेट्ने कार्यक्रम रहेको बताए। उनी १ नोभेम्बरमा नेपाल फर्कने कार्यक्रम छ।
नेपाल उद्योग वाणिज्य महासङ्घका अध्यक्ष ढकालले नेपालमा हाइड्रोपावर, पर्यटन जस्ता क्षेत्रमा लगानीको सम्भावना र अवसर धेरै रहेको बताए।
यसैबीच, मन्त्री महतको सम्मानमा राजदूतावास र जनसम्पर्क समिति बेलायतले क्रमशः सोमबार र आइतबार बेग्लाबेग्लै कार्यक्रम गर्ने भएका छन्।
