काठमाडौँ। आइसिसी विश्वकप छनोटको प्लेअफ अन्तर्गत सातौं स्थानका लागि भइरहेको खेलमा नेपालले आयरल्यान्डलाई २६९ रनको लक्ष्य दिएको छ। जिम्बाबेको हरारेमा टस हारेर ब्याटिङ गरेको नेपालले ५० ओभर पुरै खेले नौ विकेटको क्षतिमा २६८ रन बनायो।
गुल्सन झा र सन्दीप लामिछानेको उत्कृष्ट साझेदारीमा नेपालले राम्रो स्कोर खडा गर्यो। कुनै समय सात रनमा तीन विकेट गुमाएर संकटमा परेको नेपालले खेलमा पूनरागमन गर्यो। नौ नम्बरमा ब्याटिङ गर्न आएका गुल्सन झाले नटआउट अर्धशतकीय योगदान गरे। ४२ बलको सामना गर्दै ३ छक्का र चार चौका प्रहार गरेका उनी ५७ रनमा नटआउट रहे।
नेपालका लागि गुल्सन झा र सन्दीप लामिछानेले आठौँ विकेटका लागि ८० रनको साझेदारी गरे। यो नेपालबाट ओडिआईमा आठौं नम्बरको लागि भएको उच्च साझेदारी हो। यअअघि आठौं विकेटका लागि दीपेन्द्र र सन्दीपले आइतबार युएईविरुद्ध ७९ रनको साझेदारी गरेका थिए।
सन्दीपले ३२ रन जोडे। सन्दीपले ३० बलमा ३ चौका र १ छक्का प्रहार गरे। ओपनर अर्जुन साउदले ८४ बलमा ३ चौका र २ छक्काको सहयोगमा ४८ रन बनाए। कुशल मल्लले ३८ बलमा ५ चौका र २ छक्काको सहयोगमा ४४ रन बनाए। रोहित पौडेलले २९ र भीम सार्कीले २० रन बनाए। कुशल भुर्तेलले ८, ज्ञानेन्द्र मल्लले ७ रन बनाए भने दीपेन्द्रसिंह ऐरीले खाता खोल्न सकेनन्।
आयरल्यान्डका लागि मार्क अडिर, ब्यारी म्याकार्थी र क्रिग योंगले समान २–२ तथा एन्डि म्याकवर्नी, कुर्टिस क्यामफेर र गारेथ डिलेनीले समान ११ विकेट लिए।
