एजेन्सी । अन्तर्राष्ट्रिय क्रिकेट काउन्सिल (आईसीसी)ले मंगलबार एकदिवसीय विश्वकपको खेल तालिका सार्वजनिक गरेको छ ।
सन् २०२३ को पुरुष एकदिवसीय विश्वकप अक्टोबर ५ मा भारतको अहमदाबादमा सुरु हुनेछ । जसमा इंग्ल्याण्ड र न्यूजिल्याण्ड भिड्नेछन् ।
खेल भारतका १० स्थानमा आयोजना हुनेछ र फाइनल खेल पनि अहमदाबादमा नोभेम्बर १८ मा हुनेछ । सेमिफाइनल खेल नोभेम्बर १५ र १६ मा मुम्बई र कोलकातामा हुनेछ ।
प्रतियोगिताको सबैभन्दा चर्चित खेल अर्थात भारत–पाकिस्तानको खेल अक्टोबर १५ मा नरेन्द्र मोदी स्टेडियममा हुनेछ । यद्यपि, भारतले विश्वकपको सुरुवात भने अस्ट्रेलियासँग खेलेर गर्नेछ । यो खेल ८ अक्टोबरमा चेन्नईमा हुनेछ ।
४६ दिनको अवधिमा ४५ लिग खेल र तीन नकआउट अहमदाबाद, बैंगलोर, चेन्नई, दिल्ली, धर्मशाला, हैदरावाद, कोलकाता, लखनउ, मुम्बई र पुणेमा खेलाइनेछ ।
दुई सेमिफाइनल र फाइनल सबै रिजर्भ दिन हुनेछ । यदि भारत सेमिफाइनलको लागि छनोट भयो भने उसको विपक्षी पाकिस्तान नभएसम्म त्यो खेल मुम्बईमा हुनेछ । तर पाकिस्तान पनि सेमिफाइनलमा छनोट भयो र भारतसँग मुकाबिला हुने भयो भने त्यस्तो अवस्थामा खेल कोलकातामा खेलिने आईसीसीले पुष्टि गरेको छ ।
यो ढाँचा २०१९ मा जस्तै हुनेछ, जसमा दस टोलीले लिग चरणमा एक अर्कासँग खेल्नेछन् र शीर्ष चार सेमिफाइनलका लागि छनोट हुनेछन् ।
भारत आयोजकका रूपमा प्रतियोगिताको लागि छनोट भएको छ भने अफगानिस्तान, अष्ट्रेलिया, इङ्गल्याण्ड, बंगलादेश, न्युजिल्यान्ड, पाकिस्तान र दक्षिण अफ्रिकाले २०२०र२०२३ विश्वकप सुपर लिगको शीर्ष आठमा स्थान बनाएका थिए ।
बाँकी दुई टोली जिम्बाब्वेमा जारी विश्वकप छनोटमा छनोट हुनेछन् ।
