काठमाडौँ । भारतमा जारी १४ औं संस्करणको साफ च्याम्पियनसिप फुटबल अन्तर्गत नेपालले अन्तिम खेलमा जित निकालेको छ । बैंगलोरस्थित श्री कान्तीरवा स्टेडियममा भर्खरै सम्पन्न खेलमा नेपालले पाकिस्तानलाई १–० गोलले पारजित गरेको हो ।
नेपाललाई जित दिलाउन एकमात्र निर्णायक गोल आशिष चौधरीले गरे । उनले ७९ औं मिनेटमा गोल गरेका हुन् । लाकेन लिम्बुले वान टचमा उपलब्ध गराएको बललाई आशिषले डी–बक्सबाहिरबाट वान टचमै गोल गरे । आशिषको नेपालका लागि यो पहिलो गोल हो ।
जितसँगै नेपालले अन्तिम खेलमा ३ अंक जोडेको हो । यद्यपि, नेपाल र पाकिस्तान दुबै टोली नकआउट चरणबाट बाहिरिसकेका छन् ।
पहिलो खेलमा नेपाल कुवेतसँग र दोस्रो खेलमा भारतसँग पराजित भएको थियो । पाकिस्तान भने पहिलो खेलमा भारत र दोस्रो खेलमा कुवेतसँग पराजित भएको थियो । नेपालसँग पराजित भएसँगै पाकिस्तान जारी साफ च्याम्पियनसिपमा जितविहिन रह्यो ।
यस समूहबाट कुवेत र भारत सेमिफाइनलमा प्रवेश गरिसकेका छन् ।
