काठमाडौँ । साफ च्याम्पियनसिप फुटबल अन्तर्गत नेपाल समूह चरणबाटै बाहिरिएको छ । बैंगलोस्थित श्री कान्तीरवा मैदानमा भर्खरै सम्पन्न खेलमा भारतसँग २–० गोलले पराजित भएसँगै नेपालको उपाधि यात्रा समाप्त भएको हो ।
भारतलाई जित दिलाउन खेलको ६१ औं मिनेटमा सुनिल क्षेत्रीले तथा ७० औं मिनेटमा महेश सिहंले गोल गरे । सुनिलले महेश सिंहले क्रस गरेको बललाई ट्याप गर्दै गोल गरे । उनको यो भारतको लागि ९१ औं गोल हो ।
यस्तै, सुनिलले डी–बक्स भित्र नेपाली डिफेन्डरलाई बिट गर्दै प्रहार गरेको बल नेपालका गोलरक्षक किरण चेम्जोङले बचाउ गर्दा क्रसबारमा लागेर फर्किएको थियो । उक्त बललाई महेशले हेडरमार्फत गोल गरेका हुन् ।
पहिलो हाफमा भारतलाई शून्य गोलमा रोकेको नेपालले दोस्रो हाफमा भने दुई गोल खान पुगेको हो । जितसँगै भारत भने नकआउट चरणमा प्रवेश गरेको छ ।
नेपालले अब अन्तिम खेल २७ जुनमा पाकिस्तानसँग खेल्नेछ । नेपालको समूहमा भारत, कुवेत र पाकिस्तान रहेका छन् । त्यस्तै समूह ‘बी’मा लेवनान, बंगलादेश, माल्दिभ्स र भुटान रहेका छन् ।
प्रत्येक समूहको शिर्ष दुई टोली सेमिफाइनलमा प्रवेश गर्नेछन् । फाइनल खेल ४ जुलाईमा हुनेछ । कुवेत र लेबनानले आमन्त्रित टोलीको रुपमा सहभागिता जनाएका हुन् ।
