काठमाडौँ । एसीसी महिला एशिया कप टी–२० क्रिकेटको समूह चरणअन्तर्गत आफ्नो अन्तिम खेलमा नेपालले आज भारतसँग खेल्दैछ । यो खेल नेपाली समय अनुसार बेलुका सवा ७ बजे श्रीलंकाको दाम्बुला मैदानमा हुनेछ ।
पहिलो खेलमा यूएईलाई ६ विकेटले हराएको नेपाल दोस्रो खेलमा पाकिस्तानसँग ९ विकेटले हारेको थियो । सेमिफाइनलमा पुग्नका लागि नेपाललाई आजको खेलमा भारतलाई जित्नुपर्ने हुन्छ । समूह ‘ए’ मा नेपाल र पाकिस्तानको समान २–२ अङ्क छ । भारतले २ खेल जितिसकेको छ ।
नेपालको खेलअघि समूह चरणको अन्तिम खेलमा पाकिस्तान र यूएई सवा २ बजे खेल्दैछन् । यो खेलमा पाकिस्तानले हारेमा र नेपाल भारतसँग पराजित भएको अवस्थामा नेपाल, पाकिस्तान र यूएईमध्ये नेट रनरेटमा अगाडि हुने टोलीले सेमिफाइनल खेल्नेछ । पहिलो खेलमा नेपालले यूएईलाई हराउँदै ऐतिहासिक जित हासिल गरेको थियो ।
यसअघि हिजो भएको खेलमा श्रीलंकाले लगातार दोस्रो जीत हात पारेको छ । हिजो भएको खेलमा श्रीलंकाले मलेसियालाई १ सय ४४ रनले हराएको हो । श्रीलंकाले दिएको १ सय ८५ रनको लक्ष्य पछ्याएको मलेसिया अन्तिम बल बाँकी छँदा ४० रनमै अल आउट भयो । मलेसियाकी इल्सा हन्टरले १० रन बनाइन् भने अन्य खेलाडीले दोहोरो अंकमा रन जोड्न सकेनन् ।
यसअघि घरेलु मैदान दम्बुलामा टस जितेर ब्याटिङ गरेको श्रीलंकाले २० ओभरमा ४ विकेट गुमाएर १ सय ८४ रन बनायो । यो जीतसँगै श्रीलंका २ खेलमा ४ अंकसहित समूह ‘बी’ को शीर्ष स्थानमा छ । मलेसिया लगातार दोस्रो हारसँगै तालिकाको पुछारमा छ ।
