काठमाडौँ । एसिया कपका लागि श्रीलंकामा रहेको नेपाली महिला टोलीले अन्तिम अभ्यास खेलमा रोमाञ्चक जित निकालेको छ। श्रीलंका वुमन्स डेभलप्पमेन्टविरुद्धको तीन खेलको टी– २० अभ्यास खेलको अन्तिम खेलमा नेपालले २ रनको जित निकालेको हो ।
अघिल्ला दुई खेलमा पराजित नेपालले अन्तिम खेलमा सान्त्वना जित निकालेको हो । मंगलबार नेपालले प्रस्तुत गरेको १ सय १३ रनको लक्ष्य पछ्याएको श्रीलंकन टोली अन्तिम बल बाँकी हुँदा १ सय १० रनमा अलआउट भयो । उसका लागि भि बालासुर्याले ३८ रन बनाउनु सर्वाधिक रह्यो । उसको पछिल्लो क्रम सम्हालिन नसक्दा नेपाललाई तीन खेलमै पराजित गर्ने अवसरबाट वञ्चित भयो ।
श्रीलंका डेभलपमेन्टलाई अलआउट गर्ने क्रममा नेपालका लागि कविता जोशीले ३ विकेट लिँदा कृतिका मरासैनीले २ विकेट हात पारिन्। त्यस्तै, कविता कुँवर र इन्दु बर्माले समान एक विकेट लिए। श्रीलंका डेभलपमेन्टका तीन खेलाडी रनआउट भएका थिए।
त्यसअघि पहिले ब्याटिङ गरेको नेपालले निर्धारित २० ओभरमा ६ विकेट गुमाउँदै १ सय १२ रनको योगफल तयार पारेको थियो। नेपालका लागि रुबिना क्षेत्रीले सर्वाधिक ३७ रन बनाउँदा विन्दु रावलले २० रन बनाएकी थिइन्। त्यस्तै, सीता राना मगरले १५ रन बनाउँदा इन्दु वर्मा ११ रनमा आउट भइन्।
यसअघि नेपाल पहिलो खेलमा ३३ रन र दोस्रो खेलमा चार विकेटले पराजित भएको थियो। नेपालले एसिसी महिला एसिया कपको तयारीस्वरुप श्रीलंका क्रिकेट संघको महिला विकास टोलीविरुद्ध अभ्यास खेल खेलेको हो। भारत, पाकिस्तान युएई सम्मिलित समूहमा रहेको नेपालले आफ्नो पहिलो खेलमा जुलाई १९ मा युएईसँग प्रतिस्पर्धा गर्नेछ।
