ह्वीलचेयर बास्केटबलको उपाधि एपीएफ र सुदूरपश्चिमलाई

काठमाडौँ । सशस्त्र प्रहरी बलको एपीएफ क्लब र सुदूरपश्चिम प्रदेशले पारा तथा विशेष खेलकुदअन्तर्गत ह्वीलचेयर बास्केटबल प्रतियोगिताको उपाधि जितेका छन् । एपीएफ पुरुषतर्फ र सुदूरपश्चिम महिलातर्फ विजयी बनेका हुन् ।

राष्ट्रिय खेलकुद परिषद् (राखेप)को आयोजना तथा नेपाल स्पाइनल कोर्ड इन्जुरी खेलकुद सङ्घको व्यवस्थापनमा कैलालीको अत्तरखेलमा रहेको बौद्ध इन्टरनेशनल स्कुलको इन्डोर हलमा भएको पुरुषतर्फको फाइनलमा एपीएफले बागमती प्रदेशलाई ३९–२० ले हरायो । पुरुषतर्फ नै गण्डकी प्रदेशले सुदूरपश्चिमलाई २६–१६ ले हराउँदै तेस्रो भयो ।

यस्तै महिलातर्फको फाइनलमा सुदूरपश्चिमले कोशी प्रदेशलाई १५–१० ले हरायो । महिलातर्फ नै लुम्बिनीले कर्णाली प्रदेशलाई १२–८ ले हराउँदै तेस्रो भयो ।