काठमाडौँ । आइसिसी टी– २० विश्वकपकाे लागि अमेरिकामा रहेको नेपालले आज क्यानडासँग अभ्यास खेल खेल्दैछ ।
आजदेखि नेपालले टी– २० विश्वकप खेल्ने देशसँगै अभ्यास खेल खेल्न लागेको हो । टेक्ससको ग्रान्ड प्रेइरी स्टेडियममा नेपाली समयअनुसार आइतबार राति सवा ९ बजे खेल सुरू हुनेछ ।
क्यानडासँग खेलेपछि नेपालले बिहीबार अमेरिकासँग खेल्नेछ । वेस्ट इण्डिजको सेन्ट भिसेन्टमा अभ्यास खेल खेलेर जेठ ७ गते अमेरिका गएको नेपाली टोलीले त्यहाँ ह्युस्टन हुरिकेनसँग दुईवटा अभ्यास खेल खेलेको थियो । दुवै खेलमा नेपाल विजयी भएको थियो ।
विश्वकप खेल्ने नेपाली टोलीमा कप्तान रोहित पौडेल, आसिफ शेख, अनिलकुमार साह, कुशल भुर्तेल र सन्दीप जोरा प्रमुख ब्याटरको रूपमा छन् । दीपेन्द्रसिंह ऐरी, कुशल मल्ल र गुल्सन झा अलराउन्डर छन् । सोमपाल कामी, करण केसी, प्रतिश जिसी र कमलसिंह ऐरी तीव्र गतिको बलर छन् । करण र सोमपाल बलिङ अलराउन्डर पनि हुन् । स्पिनरका रूपमा सागर ढकाल र ललित राजवंशी छन् ।
