काठमाडाैँ । वेस्ट इन्डिज ‘ए’ सँगकाे टी–२० क्रिकेट शृङ्खलाकाे चाैथाे खेलमा नेपाल २८ रनले पराजित भएकाे छ ।
वेस्ट इन्डिज ‘ए’ ले दिएकाे २ सय १० रनकाे लक्ष्य पछ्याएकाे नेपाल २० ओभर १ सय ८१ रन बनाउँदा अल आउट भयाे । नेपालका कप्तान राेहित पाैडैलले सबैभन्दा धेरै ८२ रन बनाए । ४७ बल खेलेका राेहितले ५ छक्का र ७ चाैका प्रहार गरे । नेपालका अन्य ब्याटरले साथ दिन सकेनन् । सन्दीप जाेरा, दीपेन्द्रसिंह ऐरी र गुल्सन झा समान १९ रन बनाएर आउट भए । यस्तै अबिनाश बाेहराले ८ बलमा नट आउट १७ रन बनाए । वेस्ट इन्डिज ‘ए’ का म्याथ्यु फाेर्डे र हेडन वाल्शले समान ३ विकेट लिए । यस्तै फबेन एलेन र गुदाकेश माेटीले समान २ विकेट लिए ।
यसअघि कीर्तिपुरकाे त्रिवि क्रिकेट मैदानमा टस जितेर ब्याटिङ गरेकाे वेस्ट इन्डिज ‘ए’ ले २० ओभरमा ३ विकेट गुमाएर २ सय ९ रन बनायाे । वेस्ट इन्डिज ‘ए’ का आन्द्रे फ्लेचरले सबैभन्दा धेरै नट आउट ८४ रन बनाए । यस्तै जाेनसन चार्ल्सले ५८, पबेन एलेनले नट आउट ३३ रन बनाए । नेपालका कुशल भुर्तेलले २ र प्रतिस जिसीले १ विकेट लिए ।
याेसँगै वेस्ट इन्डिज ‘ए’ ले एक खेलअघि नै टी–२० क्रिकेट शृङ्खला जितेकाे छ । पहिलो खेलमा नेपालले वेस्ट इन्डिज ‘ए’ लाई चार विकेटले हराएको थियो । यस्तै दोस्रो खेलमा वेस्ट इन्डिज ‘ए’ ले नेपाललाई १० रन र हिजो भएको तेस्रो खेलमा ७६ रनले हराएको थियो । शृङ्खलाको पाँचौँ तथा अन्तिम खेल पर्सि शनिवार हुनेछ ।
नेपालले आईसीसी टी–२० विश्वकपको तयारी स्वरूप वेस्ट इन्डिज ‘ए’ सँग पाँच खेलको शृङ्खला खेलिरहेको हो । यो शृङ्खलापछि नेपाली टोली टी–२० विश्वकप खेल्न अमेरिका जानेछ ।
