एजेन्सी । यस सिजनको प्रिमियर लिग अन्त्यतिर आइसकेको छ । यस सिजन टोटनहमले अपेक्षा अनुसार खेल प्रदर्शन गर्न सकेन । प्रशिक्षक एन्टोनियो कोन्टेले बीच बाटोमा नै आफ्नो जिम्मेवारीबाट पछि हटे ।
क्लबले अन्तरिम प्रशिक्षक रायन मेसनको भरमा बाँकी खेल खेलाइरहेको छ । युरोपियन प्रतिस्पर्धामा पनि टोटनहम छनोट हुन नसक्ने प्रवल सम्भावना रहेको छ । मिडिया रिपोर्टका अनुसार यस सिजनको अन्त्यसँगै स्टार खेलाडी ह्यारी केनले क्लब छोड्ने तयारी गरेका छन् ।
उनी म्यानचेस्टर युनाइटेड जाने बलियो सम्भावना रहेको मिडिया रिपोर्टमा उल्लेख छ ।
ब्रेन्टफोर्डसँग पराजित भएसँगै उनले घरेलु मैदानमा आफ्ना फ्यानहरुलाई अन्तिम बाइ गरेको बताइएको छ ।
म्यानुले यस अघि पनि उनलाई अनुबन्ध गर्न चाहेको थियो ।
तर, केन टोटनहममा नै रहन चाहे । आफ्नो सम्झौता सकिन १२ महिना बाँकी रहेको अवस्थामा उनले क्लब छोड्ने तय गरेको बताइएको छ ।
