काठमाडौँ। उपाधि दाबेदार मछिन्द्र फुटबल क्लबलाई नेपाल पुलिस क्लबले हराएको छ। सहिद स्मारक ‘ए’ डिभिजन लिग फुटबल अन्तर्गत आइतबार च्यासल रंगशालामा भएको खेलमा पुलिसले मछिन्द्रलाई २–१ गोल अन्तरले हराएको हो।
पुलिसको जितमा मोसेस ग्याबाह त्वामले दुई गोल गरे। त्यस्तै, मछिन्द्रका आफिज ओलावालेले एक गोल गरे।
खेलको २७ औं मिनेटमा ओलावालेले गोल गर्दै मछिन्द्रलाई सुरुआती अग्रता दिलाएका थिए। तर, खेलको ७५ औं मिनेटमा मोसेसले फ्रिकिक मार्फत गोल गर्दै पुलिसलाई १–१ गोलको बराबरीमा ल्याए। त्यस्तै, खेलको ८१ औं मिनेटमा मोसेसले व्यक्तिगत दोस्रो गोल गर्दै पुलिसलाई २–१ को जित दिलाएका हुन्।
लिगमा २४ खेल खेलेको पुलिसको ३७ अंक रहेको छ। समान खेल खेलेको मछिन्द्रको ३९ अंक रहेको छ।
शीर्ष स्थानमा रहेको चर्च बोइज युनाइटेडको २४ खेलबाट ४४ अंक रहेको छ। चर्च बोइजले बाँकी दुई खेलबाट मात्र १ अंक जोडे उपाधि जित्नेछ।
