पोखरा । २३ औं आहा रारा पोखरा गोल्डकप फुटबल प्रतियोगितामा १२ टिमको टुंगो लागेको छ । आयोजक सहारा क्लब पोखराले बिहीबार पत्रकार सम्मेलन गरी टिम सार्वजनिक गरेको हो ।
आगामी माघ ९ देखि पोखरा रंगशालामा सन्चालन हुने यो प्रतियोगिता नेपालमा निरन्तर आयोजित एकमात्र फुटबल प्रतियोगिता हो । प्रतियोगितामा विभागीय नेपाल पुलिस क्लब, त्रिभुवन आर्मी क्लब, मनाङ स्र्याङ्दी, संकटा, मछिन्द्र, चर्च ब्वाइज युनाइटेड, जावलाखेल युथ, थ्रि स्टार, नवलपुरको राइजिङ फुटबल क्लब, भारतको दिल्ली फुटबल क्लब, भुटानको पारो फुटबल क्लब र आयोजक टिमले भाग लिने क्लब अध्यक्ष केशवराज बरालले जानकारी दिए ।
संकटाले गत संस्करणको उपाधि जितेको थियो । संकटाले भुटनीज युथ स्पोर्टस् क्लब, मिनोसोटा, अमेरिकालाई पराजित गरेको थियो ।
माघ ९ देखि २० सम्म संचालन हुने प्रतियोगितामा १ करोड ८६ लाख आम्दानी र १ करोड ४९ लाख खर्च हुने आयोजकको अनुमान छ ।
