काठमाडौँ । नेपाल सुपर लिग (एनएसएल)को उपाधि ललितपुर सिटी एफएसीले जितेको छ । दशरथ रंगशालामा भएको फाइनल खेलमा धनगढी एफसीलाई ३–२ गोलले पराजित गर्दै ललितपुर सिटीले उपाधि जितेको हो ।
खेलमा अग्रता धनगढीले लिएको थियो । धनगढीको लागि खेलको ३८ औं मिनेटमा ओलेवाला अफिजले गरेका थिए । तर, त्यो अग्रता धेरैबेर टिक्न सकेन । तर, पहिलो हाफको इन्जुरी समयमा ललिपुरको लागि इमो एजिकेलले गरे । उनले डिबक्स बाहिरबाट प्रहार गरेको फ्रिकिक गोलमा परिणत भएको थियो ।
खेलको दोस्रो हाफमा पनि ललितपुरले पकड बनाएको थियो । खेलको ४९ औं मिनेटमा ललिपुरका दिनेश हेम्जनले गोल गरे भने ५८ औं मिनेटमा पुनः एजिकेलले गोल गरेर खेललाई ३–१ गोलको स्थितिमा पुर्याए ।
खेलमा निकै पछि परेपछि धनगढीले आक्रामक रणनीति बनाएको थियो । तर, ललितपुरका डिफेन्डरहरु र गोलकिपर बाल्टुसले धनगढीको प्रयासलाई बिफल बनाए । खेलको इन्जुरी समयमा धनगढीका अहमद हिजाजीले गोल फर्काएपछि धनगढीको गोलकिपर टिकेन्द्र पनि ललितपुरको डिबक्समा आएर गोलको प्रयास गरेका थिए । तर, धनगढी खेलमा फर्कन नसक्दा पुनः उपाधिबाट बन्चित भएको हो ।
एनएसएलको पहिलो सिजनमा पनि धनगढी फाइनलमा काठमाडौँ रेजर्ससँग पराजित भएको थियो । यस सिजन पनि काठमाडौँ उपत्यकाभित्रको अर्को टिम ललितपुरसँग धनगढी पराजित भएको हो ।
