एनएसएलमा आज चितवन र बुटवल भिड्दै

काठमाडौँ। नेपाल सुपर लिग (एनएसएल)मा आज एफसी चितवन र एफसी बुटवल–लुम्बिनीबीच प्रतिस्पर्धा हुँदैछ। खेल त्रिपुरेश्वरस्थित दशरथ रंगशालामा साँझ ५ बजे सुरु हुनेछ।

जारी संस्करणमा चितवनले ३ खेलबाट ४ अंक जोडेको छ। चितवनले पहिलो खेलमा पोखरा थन्डर्ससँग १–० गोलले हार ब्यहोरेको थियो। दोस्रो खेलमा काठमाडौँ रेजर्ससँग १–१ गोलको बराबरी खेलेको चितवनले तेस्रो खेलमा बिरगञ्ज युनाइटेडलाई २–१ गोलले पराजित गर्दै एनएसएलमा पहिलो जित दर्ता गरेको थियो। चितवन अंक तालिकाको पाँचौं स्थानमा छ।

समान खेल खेलेको बुटवलको ३ अंक रहेको छ। पहिलो खेलमा ललितपुर सिटी एफसीसँग २–० गोलले तथा दोस्रो खेलमा धनगढी एफसीसँग १–० गोलले हार ब्यहोरेको बुटवलले तेस्रो खेलमा भने स्पोर्टिङ इलामलाई २–१ गोलले हराएको थियो। बुटवल अंक तालिकाको छैटौं स्थानमा छ।