तनहुँ । तनहुँको भिमादमा भोलि (बिहिबार) हरिबोधनी एकादशीदेखि सुरु हुन गइरहेको ‘भिमाद अर्ना कप’ फूटबल प्रतियोगिताको सम्पूर्ण तयारी पूरा भएको छ ।
राष्ट्रिय तथा अन्तर्राष्ट्रिय खेलाडीको समेत सहभागिता रहने गरी १३ गतेसम्म भिमाद रंगशालामा हुन गइरहेको प्रतियोगिताको तयारी पूरा भएको संयोजक ज्ञानेन्द्र गुरुङले जानकारी दिए ।
प्रतियोगिताको विजेताले उपाधिसहित नगद रु. २ लाख २२ हजार २२२, ट्रफि, मेडल र प्रमाण पत्र प्राप्त गर्नेछ । यस्तै, उपविजेताले रु. १ लाख ११ हजार १११ रुपैयाँ, ट्रफि, मेडल र प्रमाणपत्र पुरस्कार प्राप्त गर्नेछ । व्यक्तिगत विद्यातर्फ प्रतियोगिताको सर्वोत्कृष्ट खेलाडीले रु. १० हजार नगद, ट्रफि र प्रमाण पत्र पाउनेछ भने सर्वाधिक गोलकर्ता, उत्कृष्ट गोलरक्षक, फरवार्ड, मिडफिल्डर र डिफेन्डरलाई जनही रु. ५ हजारसहित ट्रफि र प्रमाणपत्र प्रदान गरिने आयोजकले जनाएको छ ।
आयोजकका अनुसार खेलाडीहरुको दुर्घटना बीमा गरिएको छ भने मैदानमा प्राथमिक उपचारको व्यवस्था समेत मिलाएको छ । फुटबल खेलको माध्यमबाट भिमाद बजारलाई देश तथा विदेशमा चिनाउने, आन्तरिक पर्यटक भित्र्याउने र युवापुस्तालाई खेलप्रति आकर्षित गर्ने मुख्य उद्धेश्य राखिएको आयोजकको भनाई छ ।
प्रतियोगितामा एउटा टिमले ५ जना विदेशी खेलाडी समावेश गर्न पाउनेछ । खुला प्रतियोगिता भएकाले जुनसुकै टिम र खेलाडीले सहभागिता जनाउन सक्नेछन् ।
भिमाद उद्योग वाणिज्य संघ सह आयोजक रहेको प्रतियोगिताको संरक्षकमा भिमाद नगरपालिका र प्रायोजकमा यति ब्रुअरी रहेको छ । दर्शकले निःशुल्क खेल हेर्न सक्नेछन् । प्रतियोगितामा १२ टिमले सहभागिता जनाउने भएका छन् । खेलहरु बिहान ११ बजे र दिउँसो १ बजे खेलाइनेछ । यस्तै, फाइनल खेल १३ गते दिउँसो १ बजे हुने भएको छ ।
