काठमाडौं । अस्ट्रेलिया एकदिवसीय क्रिकेट विश्वकप २०२३ को फाइनलमा प्रवेश गरेको छ ।
बिहीबार भएको दोस्रो सेमिफाइनलमा दक्षिण अफ्रिकालाई ३ विकेटले पराजित गर्दै अस्ट्रेलियाले उपाधिका लागि घरेलु टिम भारतसङ्गको भेट पक्का गरेको हो ।
यसअघि भारतले पहिलो सेमिफाइनलमा न्युजिल्यान्डलाई ९ विकेटले हराएर फाइनलमा स्थान बनाएको थियो।
बिहीबार दक्षिण अफ्रिकाले दिएको २१३ रनको लक्ष्य अस्ट्रेलियाले ४७.२ ओभरमा ७ विकेटको क्षतिमा पूरा गर्यो ।
अस्ट्रेलियाका लागि ओपनर त्रविस हेडले ६२ रन जोड्दा अर्का ओपनर डेभिड वार्नर २९ रनमा आउट भएका थिए । मिचेल मार्स शून्यमा आउट भए भने तब्राइज शाम्सीबाट बोल्ड हुनुअघि ग्लेन म्याक्सलले १ रन मात्र जोड्न सके ।
मार्नस लाबुसेन १८ रन र जोश इंग्लिस २८ रनमा आउट भए । कप्तान पाट कमिङ्गसले नटआउट १४ रन र मिचेल स्टार्कले नटआउट १६ रन बनाए ।
त्यसअघि कोलकतामा टस जितेर पहिले ब्याटिङ गरेको दक्षिण अफ्रिका ४९.४ ओभरमा २१२ रनमै अलआउट भयो ।
दक्षिण अफ्रिकाका डेभिड मिलरले १०१ रन बनाए भने यस्तै हेनरिच क्लासेनले अर्धशतक बनाउनबाट चुके । उनी ४७ रन बनाएर आउट भए ।
गेराल्ड कोत्जीले १९ रन, एडिन माक्रम र कागिसो रबाडाले १०/१० रन बनाए । दक्षिण अफ्रिकाका अन्य ब्याटरले दोहोरो अंकको रन जोड्न सकेनन् ।
भारत र अस्ट्रेलियाबीचको फाइनल खेल आइतबार अहमदाबादस्थित नरेन्द्र मोदि रंगशालामा हुनेछ ।
