एजेन्सी । पाकिस्तान क्रिकेटमा यतिबेला हलचल मच्चिएको छ । एकदिवसीय विश्वकप २०२३ मा खराब प्रदर्शन गरेपछि पाकिस्तानी टोलीको चर्को आलोचना भइरहेको छ ।
यो टोली यसपटक पनि सेमिफाइनलमा पुग्न सकेन ।
यसपछि टोलीका कप्तान बाबर आजमको चर्को आलोचना भएको थियो र पीसीबीले उनलाई एकदिवसीय र टी–२० को कप्तानबाट हटाउने र टेस्ट टोलीको कप्तान कायम गरेको खबर आएको थियो ।
तर यसैबीच बाबर आजमले तीनै फर्म्याटको कप्तानीबाट राजीनामा दिएका छन् ।
पीसीबीले ट्विट गर्दै शाहीन शाह अफ्रिदीलाई टी–२० को नयाँ कप्तान बनाएको जानकारी दिएको छ ।
टेस्ट टोलीको कप्तानी शान मसूदलाई दिइएको छ । तर, पीसीबीले एकदिवसीय टोलीको कप्तानको घोषणा गरेको छैन ।
पीसीबीले कोचिङ स्टाफलाई लिएर पनि ठूलो निर्णय गरेको छ । विश्वकपमा रहेका कोचिङ स्टाफ अब एनसीएमा जाने र अब नयाँ कोचिङ स्टाफ भर्ना गरिने मिडिया रिपोर्टमा उल्लेख छ ।
