एजेन्सी । चार वर्ष चार महिना पाँच दिनपछि इतिहास दोहोरिने छ । एकदिवसीय विश्वकप क्रिकेटको पहिलो सेमिफाइनल भारत र न्युजिल्याण्डबीच मुम्बईको वानखेडे स्टेडियममा हुँदैछ । जुलाई १०, २०१९ मा एकदिवसीय विश्वकपको पहिलो सेमिफाइनल पनि यी दुई टोलीबीच भएको थियो ।
धेरै यस्ता तथ्य र कारकहरू छन् जुन २०१९ मा जस्तै यस पटक पनि उस्तै छन् । यद्यपि, टोली संयोजन र अवस्था धेरै हदसम्म फरक हुनेछ ।
भारतः
विराट अब कप्तान छैनन्, प्लेइङ–११ मा ६ परिवर्तनः २०१९ मा, विराट कोहली भारतको कप्तान थिए । उनको स्थानमा अहिले रोहित शर्माले कमाण्ड गर्नेछन् । महेन्द्र सिंह धोनी, ऋषभ पन्त, दिनेश कार्तिक, भुवनेश्वर कुमार र युजवेन्द्र चहल पछिल्लो सेमिफाइनलमा खेलेका थिए, तर यस पटक टोलीमा छैनन् । धोनीले सन्यास लिएका छन् भने बाँकी खेलाडी छनोट हुन सकेनन् । हार्दिक पाण्ड्या २०१९ मा खेलेका थिए र यस पटक पनि टोलीमा थिए तर चोटका कारण उनी बाहिर भए ।
न्युजिल्याण्डः
२०१९ जस्तै यस पटक पनि केन विलियम्सन न्यूजिल्याण्डको टिमको कमाण्डमा छन् । तर, यसपटक प्लेइङ–११ मा ६ परिवर्तन हुने निश्चित छ । २०१९ को सेमिफाइनल खेलेका मार्टिन गुप्टिल, हेनरी निकोल्स, रोस टेलर र कोलिन डे ग्रान्डहोम यस पटक टोलीमा छैनन् । टेलर र ग्रान्डहोमले सन्यास लिएका छन् । २०१९ मा खेलेका जिमी निशम टोलीमा छन् तर चोटका कारण यस पटक खेल्ने छैनन् । म्याट हेनरी पनि घाइते भएर प्रतियोगिताबाट बाहिरिएका छन् ।
अंकतालिकाः
सन् २०१९ र २०२३ को विश्वकपको अंक तालिकामा भारत शीर्षस्थानमा र न्युजिल्यान्ड चौंथो स्थानमा रह्यो । यसको मतलब यो मामिलामा कुनै परिवर्तन छैन । तर, सन् २०१९ को तुलनामा यस पटक दुवै टोलीको लिग खेलको प्रदर्शनमा पक्कै फरक छ ।
सन् २०१९ मा भारतले सेमिफाइनलअघि ७ खेल जितेको थियो । टोलीले १ खेलमा हार बेहोरेको थियो भने १ खेल (न्युजिल्यान्डविरुद्ध) वर्षाका कारण रद्द भएको थियो । यसपटक भारतीय टोलीले सबै ९ खेल जितेको छ । यसको मतलब टोली शतप्रतिशत जितका साथ नकआउट खेल्दैछ ।
न्युजिल्याण्डले २०१९ को सेमिफाइनलअघि ९ खेलमध्ये ५ जितेको थियो भने ३ खेलमा हार बेहोरेको थियो । १ खेल (भारत विरुद्ध) वर्षाका कारण रद्ध भएको थियो । यसपटक पनि न्युजिल्यान्डले ५ खेल मात्र जितेको छ तर हारको संख्या ४ पुगेको छ । अर्थात् यसपटक उसले ५६ प्रतिशत खेलमा जित र ४४ प्रतिशतमा हार ब्यहोर्यो ।
खेलमैदान र अवस्थाः
यी क्षेत्रमा सबैभन्दा ठूलो परिवर्तन भएको छ । सन् २०१९ विश्वकपको सेमिफाइनल खेल इंग्ल्याण्डको म्यानचेस्टरस्थित ओल्ड ट्राफोर्ड मैदानमा भएको थियो । यस पटकको सेमिफाइनल मुम्बईको वानखेडे स्टेडियममा हुनेछ । म्यानचेस्टर सामान्य अंग्रेजी अवस्था भएको मैदान हो । यहाँ सीम र स्विङ मुभमेन्टले फास्ट बलरहरूलाई फाइदा पुर्याउँछ । मुम्बईमा दिनमा धेरै मुभमेन्ट हुँदैन तर दोस्रो इनिङ्समा नयाँ बललाई लाइटमुनि सामना गर्न गाह्रो हुन्छ ।
के भएको थियो अघिल्लो सेमिफाइनलमा ?
२०१९ को सेमिफाइनलमा भारतले पहिले बलिङ गर्यो र न्युजिल्याण्डलाई मात्र २३९ रन बनाउन लक्ष्य दियो । त्यस दिन वर्षाका कारण खेल सम्पन्न हुन सकेन । त्यसपछि खेल रिजर्भ डे मा भयो । टीम इन्डियाले ९२ रनमा ६ विकेट गुमाएको थियो । पछि धोनी र जडेजाले राम्रो साझेदारी गरे तर अन्ततः भारत १८ रनले पराजित भयो ।
वानखेडेमा भएको एकदिवसीय खेलमा भारत ५७ प्रतिशत र न्युजिल्याण्डले ६६ प्रतिशत खेल जितेका छन् । यो मैदानमा भारतले अहिलेसम्म २१ ओडिआई खेलेको छ । टोलीले १२ खेल जित्दा ९ खेलमा पराजित भयो । यसको मतलब यहाँ टोलीको सफलता दर ५७ प्रतिशत छ । यस मैदानमा टोलीले २०११ को एकदिवसीय विश्वकपको फाइनल पनि जितेको थियो ।
न्युजिल्याण्डले मुम्बईमा ३ ओडिआई खेलेको छ जसमा २ मा जित र १ खेलमा पराजित भएको छ । यहाँ किवी टोलीको सफलता दर ६७ प्रतिशत छ । सन् २०१७ मा पनि न्युजिल्याण्डले यसै मैदानमा भारतलाई ६ विकेटले पराजित गरेको थियो ।
जारी विश्वकपमा भारतले यस मैदानमा १ खेल खेलेको छ (श्रीलंका विरुद्ध) । जसमा भारतीय टोलीले श्रीलंकालाई ३०२ रनले पराजित गरेको थियो । यता, न्यूजिल्याण्डको भने यस मैदानमा यो पहिलो खेल हुनेछ ।
