तनहुँ । तनहुँको भिमादमा हरिबोधनी एकादशीको अवसर पारेर फुटबल प्रतियोगिता आयोजना हुने भएको छ । आउँदो मंसिर ७ गतेदेखि भिमाद रंगशालामा भिमाद अर्ना कप फुटबल प्रतियोगिता (११–ए साइड) सञ्चालन हुने भएको हो ।
प्रतियोगितामा सहभागिता जनाउन कार्तिक २५ गतेदेखि मंसिर ५ गतेसम्म टिम दर्ता गर्न सकिने कार्यक्रम संयोजक ज्ञानेन्द्र गुरुङले जानकारी दिए । १६ टिम भन्दा बढी टिमलाई सहभागि नगराइने पनि उनले जानकारी दिए ।
संयोजक गुरुङका अनुसार प्रतियोगिताको विजेता टोलीले २ लाख २२ हजार २२२ नगद तथा ट्रफि एवं प्रमाणपत्र प्राप्त गर्नेछ । यस्तै, दोस्रो हुने टोलीले १ लाख ११ हजार १११ रकमसहित ट्रफि एवं प्रमाणपत्र प्राप्त गर्नेछ ।
साथै, प्रतियोगिताको उत्कृष्ट खेलाडीले १० हजार तथा हाई स्कोरर, बेस्ट किपर, बेस्ट फरवार्ड, बेस्ट मिडफिल्डर र बेस्ट डिफेन्डरले ५–५ हजार प्राप्त गर्नेछन् ।
यसअघि पनि एकादशीको अवसरमा भलिबल तथा फुटबल प्रतियोगिता आयोजना हुँदै आएको यस भिमादमा यस्ता खेलकुद प्रतियोगितामा उल्लेख्य दर्शकको उपस्थिती रहँदै आएको छ । यस प्रतियोगिताले खेल पर्यटनको माध्यमबाट भिमादलाई थप चिनाउने आयोजकको विश्वास छ ।
युवा क्लब भिमादको आयोजनामा हुन गइरहेको प्रतियोगिताको प्रायोजक यती ब्रुअरी लिमिटेड रहेको छ ।
