काठमाडौँ। ओमानले आइसिसी टी–२० विश्वकप एसिया क्षेत्र छनोटको उपाधि जितेको छ। त्रिवि क्रिकेट मैदानमा भएको खेलमा नेपाललाई सुपर ओभरमा हराउँदै ओमानले उपाधि जितेको हो।
म्याच स्कोर बराबरी भएपछि सुपर ओभरमा गएको थियो। सुपर ओभरको सुरुमा ब्याटिङ गरेको ओमानले २० रन जोड्यो। नसिम खुसीले १९ रन तथा आक्विब इलियासले १ रन जोड्यो। अभिनास बोहोराले गरेको बलिङमा नसिमले ती छक्का हिर्काए।
सुपर ओभरमा ब्याटिङ गर्न आएका कुशल भुर्तेल बिलाल खानको पहिलो बलमै आउट भए। बिलालले दोस्रो बल डट फाले। तेस्रो र चौथो बलमा नेपालले एक–एक रन जोड्यो भने पाँचौ र छौटौ बलमा कुशल मल्लले दुई–दुई चौका प्रहार गरे पनि जितको लागि पर्याप्त भएन।
टस जितेर ब्याटिङ थालेको नेपालले निर्धारित २० ओभरमा ६ विकेटको क्षतिमा १८४ रन जोडेर १८५ रनको लक्ष्य दिएको थियो। ओमानले पनि २० ओभरमा समाप्तीमा ९ विकेट गुमाउँदै १८४ रन नै जोडेपछि खेल सुपर ओभरमा गएको हो।
नेपालका लागि गुलशन झा र कप्तान रोहित पौडेलले अर्धशतकीय पारी खेले झाले २५ बलमा ५४ रन जोडे भने पौडेल ५२ रनमा अविजित रहे। यस्तै, कुशल भुर्तेलले २२ बलमा ३१ रनको योगदान दिए भने करण केसीले ६ बलमा २० रन जोडे।
ओमानका लागि बलिङतर्फ विलाल खानले तीन विकेट लिए भने अकिव इलियासले दुई तथा जिसन मक्सुदले एक विकेट लिए।
जवाफी ब्याटिङमा आएको ओमानको लागि सर्वाधिक रन कश्यप प्रजापतिले जोडे। उनले ६३ रन जोडे। त्यस्तै, आक्विस इलियासले ३३, जिसान माकसुदले २६, मोहम्मद नादिमले २४, आयान खान तथा मिरान खानले समान १०–१० रन जोड्दा अन्य ब्याट्सम्यानहरुले दोहोरो अंक जोड्न सकेनन्।
बलिङतर्फ करण केसी र सन्दीप लामिछानेले २–२ विकेट तथा सोमपाल कामी, गुल्सन झा, अभिनास बोहोरा र विवेक यादवले समान एक–एक विकेट लिए।
नेपाल र ओमान दुवैले सन् २०२४ मा वेस्ट इन्डिज र अमेरिकामा हुने विश्वकप प्रतियोगितामा स्थान बनाइसकेका छन् ।
