काठमाडौँ। टी–२० विश्वकप फाइनल एसियामा नेपालले सिंगापुरमाथि ८ विकेटको जित हात पारेको छ। त्रिवि क्रिकेट मैदानमा भर्खरै सम्पन्न खेलमा नेपालले सिंगापुरलाई हराउँदै सुखद सुरुवात गरेको हो।
सिंगापुरले दिएको १४६ रनको लक्ष्य नेपालले १६.३ ओभरमा मात्र २ विकेट गुमाएर भेट्टाएको हो।
नेपालको लागि कुशल भुर्तेलले अर्धशतक बनाए। ओपनर भुर्तेलले ७४ रन जोडे। उनले ४८ बलको सामना गर्दा ८ चौका र २ छक्का प्रहार गरे। अर्का ओपनर आसिफ शेखले २७ रन बनाए। उनले २६ बलमा २ चौका र १ छक्का प्रहार गरे।
त्यस्तै, कप्तान रोहित पौडेलले २४ बलमा नटआउट ३५ रन जोडे भने १ बल सामना गरेका कुशल मल्लले छक्का प्रहार गरेर नेपालको जित निश्चित गरेका हुन्।
टस जितेर पहिले ब्याटिङ रोजेको सिंगापुरले ९ विकेटको क्षतिमा १४५ रन जोड्यो। सिंगापुरको लागि सर्वाधिक रोहन रंगराजनले १ छक्का र ८ चौकाको मदतमा ४६ रन जोडे। त्यस्तै आर्यभिर चौधरीले ३७ रन, मनप्रित सिंहले २४ रन, अक्षय पुरीले १३ रन जोड्दा अन्य ब्याट्सम्यानहरुले दोहोरो अंक जोड्न सकेनन्।
सिंगापुरविरुद्ध नेपालका अभिनास बोहोराले ३ विकेट लिए। त्यस्तै, करण केसी, सन्दीप लामिछाने र गुल्सन झाले सामान २–२ विकेट लिए।
