एजेन्सी । इंग्लिस प्रिमियर लिग फुटबल अन्तर्गत चेल्सी र आर्सनलले बराबरी खेलेका छन् । गएराति भएको लण्डन डर्बी खेलमा दुबै टोलीले २-२ गोलको बराबरी खेल्दै अंक बाँडेका हुन् । खेलमा अग्रता भने घरेलु टोली चेल्सीले लिएको थियो ।
चेल्सीको मैदान स्टाम्फोर्ड ब्रिजमा भएको खेलमा १५ औं मिनेटमा कोल पाल्मेरले पेनाल्टीमार्फत गोल गर्दै चेल्सीलाई सुरुवाती अग्रता दिलाएका थिए । डी बक्सभित्र आर्सनलका डिफेन्डर विलियम सलिबाको हातमा बल लागेपछि चेल्सीले पेनाल्टी पाएको थियो ।
४८ औं मिनेटमा मिखाइलो मड्रिकले गोल गर्दै चेल्सीको अग्रता दोब्बर पारे । डीबक्स बाहिरबाट देब्रे खुट्टाले चिप बल प्रहार गर्दै उनले सुन्दर गोल गरे ।
यता, ७७ औं मिनेटमा डेक्लान राइसले गोल गर्दै आर्सनललाई १-२ को स्थितीमा ल्याए । चेल्सीका गोलकिपर रोबर्ट सान्चेजले बल पास दिँदा मिस भई राइसले सिधै प्रहार गर्दै डिबक्स बाहिरबाट वान टचमै गोल गरे ।
यस्तै, ८४ औं मिनेटमा लिन्ड्रो ट्रोसार्डले गोल गर्दै आर्सनललाई २-२ गोलको बराबरीमा ल्याउँदै टोलीको अपराजित यात्रा कायमै राखे । बुकायो साकाले टाढाबाट उपलब्ध गराएको पासलाई उनले सदुपयोग गर्दै गोल गरे ।
यो नतिजासँगै आर्सनल ९ खेलबाट २१ अंकका साथ तालिकाको दोस्रो स्थानमा रहेको छ । चेल्सी समान खेलबाट १२ अंकका साथ १० औं स्थानमा छ ।
