एजेन्सी । स्पेनिस फुटबल लिग ला लिगा अन्तर्गत बार्सिलोनाले बराबरी खेलेको छ । गएराति भएको खेलमा बार्सिलोना ग्रानडासँग उसको घरेलु मैदानमा २–२ गोलमा रोकिएको हो ।
ब्रायन जारागोजा मार्टिनेजले खेलको सुरुवाती मिनेटमा नै गोल गर्दै घरेलु टोली ग्रानडालाई सुरुवाती अग्रता दिलाएका थिए । २९ औं मिनेटमा मार्टिनेजले नै गोल थप्दै ग्रानडालाई २–० गोलले अघि बढाए ।
यता, पहिलो हाफको इन्जुरी समयमा लामिने यामलले गोल गर्दै बार्सिलोनालाई १–२ को अग्रतामा झारे ।
ग्रानडाविरुद्धको गोलसँगै यामल ला लिगामा गोल गर्ने सबैभन्दा कान्छा खेलाडी बनेका छन् । उनले १६ वर्ष ८७ दिनमा गोल गर्दै यो कीर्तिमान बनाएका हुन् ।
यसअघि ला लिगामा यो कीर्तिमान फाब्रिस ओलिंगाको नाममा थियो । उनले सन् २०१२ मा १६ वर्ष ९८ दिनमा मालगाबाट गोल गर्दै कीर्तिमान राखेका थिए ।
यस्तै, ८५ औं मिनेटमा सर्जी रोबर्टोले गोल गर्दै बार्सिलोनालाई २–२ को बराबरीमा ल्याउँदै हारबाट जोगाए ।
अपराजित रहेको बार्सिलोनाको यो समग्रमा तेस्रो बराबरी हो । बार्सिलोना ९ खेलबाट २१ अंकका साथ तालिकाको तेस्रो स्थानमा रहेको छ । ग्रानडा समान खेलबाट ६ अंकका साथ १९ औं स्थानमा छ । ग्रानडापछि एकमात्र टोली अल्मेरिया ३ अंकका साथ २० औं स्थानमा छ ।
