एजेन्सी । भारतमा बिहीबारदेखि सुरु भएको एक दिवसीय विश्वकप क्रिकेटको उद्घाटन खेलमा न्युजिल्यान्डले इङ्ल्यान्डविरुद्ध विशाल जित हात पारेको छ ।
गुजारतको नरेन्द्र मोदी स्टेडियममा भएको खेलमा डेभन कन्वे र रचिन रवीन्द्रले २७३ रनको अविजित साझेदारी गर्दै ३६.२ ओभरमै न्युजिल्यान्डलाई ९ विकेटको जित दिलाए।
इङ्ल्याण्डले दिएको २८३ रनको लक्ष्य पछ्याएको न्युजिल्यान्डका लागि डेभन कन्वेले १५२ र रचिन रविन्द्रले १२३ को अविजित पारी खेले ।
१२१ बलको सामना गरेका डेभनले १९ चौका र ३ छक्का प्रहार गरे भने रचिनले ९६ बलको सामना गर्दा ११ चौका र ५ छक्का हिर्काए ।
ओपनर विल योङ दोस्रो ओभरको पहिलो बलमै आउट भएपछि आएका रचिनले डेविनसँगै अविजित साझेदारी गर्दा इङ्ल्यान्डका बलर निरीह बन्नुपर्यो ।
इङ्ल्यान्डका साम करनले पहिलो बलमै विललाई आउट गरे पनि अरु बलरले विकेट लिन नसक्दा उसको विश्वकप खराब हारबाट सुरुवात भयो ।
त्यसअघि टस हारेर पहिला ब्याटिङको निम्तो पाएको इंग्ल्यान्डले निर्धारित ५० ओभरमा ९ विकेट गुमाउँदै २ सय ८२ रन बनाएको थियो ।
जो रुटले ८६ बलको समाना गर्दा ४ चौका र १ छक्कासहित सर्वाधिक ७७ रन बनाए । कप्तान जोस बटलर ४३ रनमा आउट हुँदा ओपनर जोनी बेयरस्टो ३३ र डेविड मलान १४ रन मै पेभिलियन फर्किए । त्यसपछि इङ्ल्यान्डले लगातार विकेट गुमायो।
ह्यारी क्रुक २५, मोईन अली ११, लियाम लिभिङस्टोन २०, साम करन १४ र क्रिस वोक्स ११ रनमा आउट हुँदा आदिल राशिद १५ र मार्क वुड १३ रनमा नटआउट रहे ।
न्युजिल्यान्डका लागि तीव्र गतिका बलर म्याट हेनरीले १० ओभरमा ४८ रन खर्चिएर ३ विकेट लिए । स्पीनर मिचेल सान्टनारले १० ओभरमा ३७ रन खर्चेर २ विकेट लिए भने ग्लेन फिलिप्सले ३ ओभरमा १७ रन खर्चेर २ विकेट लिए । ट्रेन्ट बोल्टले १० ओभरमा १ मेडनसहित ४८ रन खर्चिदै एक विकेट हात पारे ।
अब न्युजिल्यान्डले सोमबार नेदरल्यान्ड्ससँग हैदराबादमा खेल्दा इङ्ल्यान्डले मंगलबार बंगलादेशसँग खेल्नेछ ।
