काठमाडौँ । नेपालले चीनमा जारी १९ औँ एसियाली खेलकुदअन्तर्गत पुरुष क्रिकेटको क्वाटरफाइनलमा स्थान बनाएको छ ।
समूह चरणको दोस्रो खेलमा नेपालले आइतबार माल्दिभ्सलाई १३८ रनले पराजित गर्यो । २१३ रनको लक्ष्य पछ्याएको मालदिभ्स ७४ रनमा समेटियो । माल्दिभ्सलाई सस्तैमा समेट्न नेपालका अविनाश बोहरा एक्लैले ६ विकेट लिए । बोहरा टि२० आईमा ६ विकेट लिने पहिलो नेपाली बलर बने । यसअघि सन्दीप लामिछाने र करण केसीले समान ५–५ विकेट लिएका थिए ।
यस्तै, सोमपाल कामी, गुल्सन झा, सन्दीप लामिछाने र कुशल भुर्तेलले एक–एक विकेट लिए । त्यसअघि टस जितेर पहिला ब्याटिङ थालेको नेपालले निर्धारित २० ओभरमा ७ विकेट गुमाएर २ सय १२ रन जोडेको थियो । नेपालका लागि कप्तान रोहित पौडेलले ५२ , गुल्सन झाले ३५, कुशल मल्लले अविजित ४७ र कुशल भुर्तेलले ३५ रनको योगदान दिए ।
नेपालले यसअघि पहिलो खेलमा मंगोलियामाथि विश्व कीर्तिमानी जित निकालेको थियो ।
