काठमाडौँ। नेपालले माल्दिभ्सलाई पराजित गरेको छ। दक्षिण एसियाली फुटबल महासङ्घ (साफ) यू–१९ च्याम्पियनसीपअन्तर्गत सोमबार दशरथ रंगशालामा भएको खेलमा नेपालले माल्दिभ्सलाई ४–१ गोलले पराजित गरेको हो।
नेपालको लागि खेलको १७ औं मिनेटमा प्रशान्त लक्षमले गोल गरे। त्यस्तै, ३० औं मिनेटमा समिर तामाङले गोल गरे। नेपालको लागि तेस्रो गोल ८८ औं मिनेटमा निराजन धामीले गरे भने अतिरिक्त समयमा समिरले गोल गर्दै नेपालको जित सुनिश्चित गरे।
माल्दिभ्सको लागि ५८ औं मिनेटमा लायन रसिदले गोल गरे।
जितसँगै नेपाल सेमिफाइनलमा प्रवेश गरेको छ। पहिलो खेलमा नेपाल पाकिस्तानसँग १–० ले पराजित भएको थियो। मादिभ्सविरुद्धको जितपछि नेपाल सेमिफाइनलमा पुगेको हो।
पाकिस्तानले माल्दिभ्ससँग १–१ को बराबरी खेलेकोले उ समूह बिजेता बनेको छ। एक खेल जितेको नेपाल भने समूह उपबिजेता बन्दै सेमिफाइलमा पुगेको हो।
समूह ‘बी’ बाट भारत र भुटान सेमिफाइनल पुगिसकेका छन्।
आजै हुने दोस्रो खेलमा भुटानले भारतको सामना गर्नेछ। यी दुई टोलीबीचको खेल साँझ साढे ५ बजे त्रिपुरेश्वरस्थित दशरथ रंगशालामा सुरु हुनेछ।
