काठमाडौँ । क्रिकेटर सन्दीप लामिछानेविरुद्ध जिल्ला अदालत काठमाडौंमा चलिरहेको बलात्कार मुद्दा आज पनि स्थगित भएको छ ।
आज सुनुवाइको पेसी तारिख तोकिएको थियो । तर, न्यायाधीश अभावका कारण मुद्दा पेसीमा चढ्न सकेन ।
न्यायपरिषद्ले हालै केही न्यायाधीश सरुवा गरेको छ भने केही उच्च अदालतमा बढुवा भएका छन् । सरुवा भएर जानेले मुद्दा नहेर्ने र आउनुपर्ने आइनसकेका कारण सीमित न्यायाधीशले मुद्दा हेर्न नभ्याएको बताइएको छ ।
उक्त मुद्दाको पेसी अब कहिले तोकिन्छ भन्ने टुंगो लाग्न सकेको छैन । यसैबीच, नेपाली राष्ट्रिय क्रिकेट टोली चीनको हाङ्जाउमा जारी १९औँ एसियाली खेलकुद प्रतियोगितामा भाग लिन त्यसतर्फ प्रस्थान गर्दैछ । सन्दीप भने आज टोलीसँग चीन नजाने भएका छन् ।
नेपालले यही असोज १० गते आफ्नो पहिलो खेल मङ्गोलियासँग खेल्ने छ । त्यस्तै नेपालले समूह चरणको दोस्रो खेल असोज १४ गते माल्दिभ्ससँग खेल्नेछ ।
