काठमाडौँ । एसिया कप क्रिकेटमा भारतले नेपाललाई १० विकेटले पराजित गर्न सफल भएको छ । यो हारसँगै समूह ‘ए’ मा रहेको नेपाल एसिया कपबाट बाहिरिएको छ । पहिलो खेलमा पाकिस्तानसँग हारेको नेपाल दोस्रो खेलमा भारतसँग पराजित हुँदै एसिया कपबाट बाहिरिएको हो ।
भारत सुपर चारमा प्रवेश गरेको छ ।
श्रीलङ्काको केन्डीस्थित पालेकेल अन्तर्राष्ट्रिय क्रिकेट मैदानमा सोमबारको खेल वर्षाका कारण २३ ओभरमा झारिएको थियो ।
डकवर्थ लेविस प्रणालीका आभारमा जितका लागि एक सय ४५ रनको लक्ष्य पछ्याएको भारतले २०.१ ओभरमा बिनाविकेटको क्षति एक सय ४७ रन बनायो ।
भारतको जितमा ओपनरद्वय कप्तान रोहित शर्मा र शुबमन गिलले सानदार अर्धशतकीय इनिङ्स खेले ।
रोहित शर्माले ७४ रन बनाए । उनले ५९ बलमा ६ चौका र पाँच छक्काको सहयोगमा उक्त रन बनाए । शुबमनले ६७ रन बनाए । उनले ६२ बलमा आठ चौका र एक छक्काको सहयोगमा उक्त रन बनाए ।
दुई घण्टा भन्दाबढी समय रोकिएपछि खेल २३ ओभरमा झारिएको थियो ।
यसअघि टस हारेर पहिला ब्याटिङ गर्ने निम्तो पाएको नेपालले ४८.२ ओभरमा सवै विकेटको क्षतिमा दुई सय ३० रन बनाएको थियो ।
