एजेन्सी । १६ औं संस्करणको इन्डियन प्रिमियर लिग (आईपीएल)को चेन्नई सुपर किंग्स र गुजरात टाइटन्सबीचको फाइनल आइतबार वर्षाका कारण हुन सकेन ।
अब च्याम्पियनको टुंगो रिजर्भ डे (सोमबार) लाग्नेछ । लगातारको वर्षाका कारण आइतबार टस पनि हुन सकेन । वर्षाले रंगशाला पोखरीमा परिणत भएको थियो ।
अम्पायरले दुवै टोलीका प्रशिक्षक र कप्तानसँग कुराकानी गरेपछि खेल नगर्ने निर्णय गरेका हुन् । राति ११ बजे वर्षा रोकिए पनि मैदान खेल्न योग्य बनाउन कम्तिमा एक घण्टा लाग्ने थियो । त्यसपछि खेल भएको भए दुवैले पाँच–पाँच ओभर मात्र खेल्ने थिए । अम्पायरले दुवै टोलीका प्रशिक्षक र कप्तानसँग कुराकानी गरेपछि खेल स्थगित गरेका हुन् ।
अब आज सोमबार रिजर्भ डेमा फाइनल सोही समयमा (साँझ ७ः४५ बजे) खेलाइनेछ । गएराति नौ बजे वर्षा रोकिएको थियो र मैदान लगभग खेल्न योग्य बनाइसकेको थियो तर फेरि पानी परेपछि खेल हुन नसकेको हो ।
लिग इतिहासमा पहिलो पटक दुवै टोली फाइनलमा भिड्दैछन् । गुजरातको यो दोस्रो सिजन मात्र हो, गत वर्ष टोली च्याम्पियन बनेको थियो तर चेन्नई भने समूह चरणबाटै बाहिरिएको थियो ।
नरेन्द्र मोदी स्टेडियम गुजरातको घरेलु मैदान हो । यस खेलमा गुजरातले अहिलेसम्म नौ खेल खेलेको छ जसमा उसले छ जित र तीन हार बेहोरेको छ । अर्कोतर्फ चेन्नईले यस मैदानमा अहिलेसम्म तीन खेल खेलेको छ र तीनवटै हार बेहोरेको छ । नरेन्द्र मोदी स्टेडियम पहिले सरदार पटेल स्टेडियम, मोटेरा भनेर चिनिन्थ्यो ।
गत आईपीएल सिजनमा लखनऊ र गुजरातबाट २ नयाँ टोली थपिएका थिए । दुवै प्लेअफमा पुगेपनि गुजरातले उपाधि जितेर सबैलाई चकित बनाएको थियो । यसपटक पनि करिब सोही खेलाडीसहित टोली प्रतियोगितामा प्रवेश गरेको छ ।
हार्दिक पाण्ड्याको कप्तानीमा रहेको गुजरात उपाधि रक्षा गर्न दबाबमा रहनेछ । टोलीले यो सिजन हालसम्म कुल १६ खेल खेलेको छ (लिग चरण र प्लेअफ), जसमा उसले ११ जित र पाँचमा हार बेहोरेको छ ।
हेड टु हेडको कुरा गर्ने हो भने दुई टोलीबीच हालसम्म जम्मा चार खेल भएका छन् जसमा गुजरातले तीन पटक र चेन्नईले एक पटक जित हात पारेको छ ।
