काठमाडौँ । एसिया कप क्रिकेटमा आज नेपालले भारतसँग प्रतिस्पर्धा गर्दैछ । श्रीलङ्काको पालेकेले इन्टरनेशल क्रिकेट स्टेडियममा आज दिउँसो ३ः१५ बजे सुरु हुने खेलमा नेपाललाई भारतमाथि जित्नै पर्ने दबाब रहेको छ ।
समूह ‘ए’ अन्तर्गत पहिलो खेलमा नेपाल पाकिस्तानसँग दुई सय ३८ रनले पराजित भएको थियो । पाकिस्तानले दुई खेलबाट तीन अङ्क जोडिसकेको छ । पाकिस्तान सुपर चारमा प्रवेश गरिसकेको छ । भारत र पाकिस्तानबीच शनिबार भएको खेल वर्षाका कारण रद्द भएको थियो ।
पाकिस्तानसँग बराबरी खेलेको भारतले नेपाललाई बराबरीमा रोक्न सके पनि अर्को चरणमा पुग्नेछ ।
नेपाललाई भने सुपर चारमा पुग्न भारतलाई हराउनै पर्ने दबाब छ ।
भारतको सिनियर टोलीसँग पहिलो पटक प्रतिस्पर्धा गर्न लागेको नेपालले सुधारिएको खेल प्रदर्शन गर्ने नेपालका प्रशिक्षक मोन्टि देसाईले बताएका छन् ।
पाकिस्तानविरुद्धको पहिलो खेलमा नेपालको व्याटिङ र बलिङ कम पक्ष कमजोर देखिएको थियो । तर, दोस्रो खेलमा सुधारिने प्रशिक्षक देसाईको विश्वास रहेको छ ।
नेपाललाई इतिहास रच्ने अवसर समेत रहेको उनले बताए ।
शनिबार भारत र पाकिस्तानको खेलमा वर्षा बाधक बने जस्तै सोमबार पनि श्रीलङ्काको कान्डीमा वर्षाको सम्भावना रहेको छ । यदि वर्षाले खेल रद्द भएमा नेपाललाई दुर्भाग्य हुनेछ । भारत भने बराबरी नतिजाले अगाडि बढ्नेछ ।
एसिया कपमा नेपाल, भारत र पाकिस्तान समूह ‘ए’ मा छन् । समूह ‘बी’ मा श्रीलङ्का, बङ्गलादेश र अफगानिस्तान छन् । समूहको शीर्ष दुई टोली सुपर चारमा प्रवेश गर्नेछन् । सुपर चारको शीर्ष दुई टोलीबीच उपाधिका लागि प्रतिस्पर्धा हुनेछ ।
