एजेन्सी । युइएफए सुपर कपको उपाधि इंग्लिस क्लब म्यान्चेस्टर सिटीले जितेको छ । गएराति भएको फाइनल खेलमा स्पेनिस क्लब सेभियालाई टाईब्रेकरमा ५–४ गोलले हराउँदै सिटी च्याम्पियन बनेको हो ।
ग्रीसको काराइस्काकीस स्टेडियममा भएको फाइनलमा सुरुवाती अग्रता भने सेभियाले लिएको थियो । उसका लागि खेलको २६ औं मिनेटमा युसेफ एन नेसीरीले गोल गर्दै सेभियालाई सुरुवाती अग्रता दिलाएका थिए ।
तर, ६३ औं मिनेटमा कोल पाल्मेरले गोल गर्दै सिटीलाई १–१ गोलको बराबरीमा ल्याए । बराबरीसँर्ग खेलको विजेताको टुंगो पेनाल्टीबाट लाग्यो । पेनाल्टीमा सिटीका एर्लिङ हालाण्ड, युलियन अल्भारेज, माटीओ कोभाचिच, ज्याक ग्रिलिस र किले काल्करले गोल गरे ।
सेभियाका लुकास ओकाम्पोस, राफा मिर, इभान राकिटिच, गोन्जालो मोल्टेइलले गोल गर्दा नेमान्जा गुडेल्ज गोल गर्न चुके । सुपर कपमा च्याम्पियन्स लिग विजेता र युरोपा लिग विजेताले प्रतिस्पर्धा गर्छन् ।
साथै सिटीका प्रशिक्षक पेप ग्वार्डिओलाले सिटीबाट १५ ट्रफि जित्न सफल भएका छन् । यसअघि उनले स्पेनिस क्लब बार्सिलोनाबाट १४ ट्रफि जितेका थिए । अर्कोतर्फ ग्वार्डिओला बार्सिलोना (२ पटक), बायर्न म्युनिख र म्यान्चेस्टर सिटी गरी तीन क्लबबाट सुप कप जित्ने प्रशिक्षक समेत बनेका छन् ।
योसँगै सिटीले प्रिमियर लिग, एफए कप, च्याम्पियन्स लिग र सुपर कप गरी ४ वटा ट्रफि जितेको छ ।
