एजेन्सी । पेरिस सेन्ट जर्मेन (पिएसजी)स्टार केलिएन एम्बाप्पे अन्ततः क्लबको प्रशिक्षणमा फर्किने भएका छन् । पिएसजीले यसअघि एम्बाप्पेलाई आफ्नो मुख्य टिमसँग प्रशिक्षणको अनुमति दिएको थिएन भने उनलाई पहिलो खेलमा बेन्चमा राखिएको थियो ।
तर, एम्बाप्पे र क्लब प्रतिनिधिबीचको छलफल सकरात्मक भएपछि आइतबारबाट उनी पिएसजीको मुख्य टोलीसँगै प्रशिक्षणमा फर्किन लागेका हुन् ।
क्लबले भनेको छ – ‘पिएसजी–लोरिएन्ट खेलअघि पेरिस सेन्ट–जर्मेन र केलियन एम्बाप्पेबीच सकारात्मक छलफल भएको छ । जसअनुसार एम्बाप्पेलाई प्रशिक्षण टोलीमा पुनर्स्थापित गरिएको छ ।’
शनिबार राति भएको सिजनको पहिलो खेलमा एमबाप्पेलाई बेन्चमा राखेको पिएसजी लोरिएन्टसँग गोलरहित बराबरीमा रोकिएको थियो । उक्त खेलमा एम्बाप्पेलाई टिममा सहभागी गराइएको थिएन ।
यो सिजनमै पिएसजीले एम्बाप्पेलाई बेच्न निकै प्रयास गरिरहेको छ । उनी आगामी सिजन फ्री ट्रान्सफर हुने भएकाले उनलाई यसै सिजन बेच्न क्लब कम्मर कसेर लागेको हो ।
यता, एम्बाप्पे भने आफ्नो अन्तिम एक वर्षे सम्झौताअनुसार उनी पिएसजीमा नै यो सिजन बसेर अर्को सिजन फ्री ट्रान्सफरमा रियल मड्रिड जाने सोचमा रहेका छन् ।
एम्बाप्पेसँग असन्तुष्टिकै कारण पिएसजीले उनलाई प्रि–सिजनको एशिया भ्रमणमा साथमा लगेको थिएन भने टिमको मुख्य खेलाडीहरुसँग प्रशिक्षणको अवसरसमेत दिएको थिएन ।
सिजन सुरु हुनुअघि साउदी क्लब अल–हिलालले एम्बाप्पेमाथि विश्व कीर्तिमानी २ सय ५९ मिलियन पाउन्डको प्रस्ताव पिएसजीसँग गरेको थियो । एम्बाप्पेले उक्त प्रस्ताव अस्वीकार गरेका थिए ।
पिएसजीले आगामी शनिबार टौउलौउसेसँग प्रतिस्पर्धा गर्दैछ । प्रशिक्षणमा बोलाएसँगै एम्बाप्पे उक्त खेलबाट मैदान फर्किने सक्नेछन् । यसबारे क्लबको आधिकारिक धारणा भने सार्वजनिक भएको छैन ।
