काठमाडौं । एसीसी इमर्जिङ टिम्स एसिया कप क्रिकेट प्रतियोगिताको उपाधि पाकिस्तान ए ले जितेको छ । आइतबार भएको फाइनल खेलमा पाकिस्तान ए ले चिर प्रतिद्वन्द्वी भारत ए लाई एक सय २८ रनको विशाल अन्तरले हराउँदै उपाधि आफ्नो पोल्टामा पारेको हो ।
टस हारेर पहिले ब्याटिङको निम्तो पाएको पाकिस्तानले निर्धारित ५० ओभरमा आठ विकेट गुमाएर तीन सय ५२ रनको विशाल स्कोर बनाएको थियो । पाकिस्तानका लागि मुहम्मद तैयब ताहिरले टोलीका लागि शतकीय योगदान गरेका थिए । उनले एक सय आठ रन बनाए । उनले केवल ७१ बलको सामना गरी चार छक्का र १२ चौका पनि प्रहार गरे ।
ओपनर ब्याट्सम्यान सइम अयुब र सहिबजादा फरहान उल्लाहले पनि अर्धशतकीय पारी खेले । सइमले ५९ रन बनाए भने अर्का ओपनर सहिबजादाले ६५ रन बनाए ।
ओपनिङ ब्याट्सम्यानले एक सय २१ रनको साझेदारी गरेका थिए । तेस्रो नम्बरमा क्रिज समाल्न आएका ओमाइर बिन युसुफले पनि टोलीको लागि ३५ रनको योगदान दिए । सातौं नम्बरका ब्याट्सम्यान मुबासिर खानले पनि ३५ रन बनाए । भारतीय बलर राजबद्र्धन हंगारगेकर र रियान परागले दुई–दुई विकेट लिए । मानव सुथर र हर्षित राणाले एक–एक विकेट लिए ।
जवाफी ब्याटिङमा उत्रिएको भारतले ४० ओभरमा अलआउट हुनुअघि दुई सय २४ रनमात्र बनाउन सक्यो । भारतका कुनै पनि ब्याट्सम्यान लामो समय क्रिजमा टिक्न सकेनन् । ओपनर ब्याट्सम्यान अभिषेक शर्माले ६१ रन बनाए । उनले ५१ बलमा एक छक्का र पाँच चौका प्रहार गरे ।
भारतीय टोलीका कप्तान यस ढुलले ३९ रन बनाए । ओपनर साई सुदर्शन २९ रन जोड्दै पेभेलियन फर्किए । पाकिस्तानी टोलीका बलर सुफियान मुकिमले तीन विकेट लिए । मेहरान मुमताज, अर्साद इक्बाल र मुहम्मद वसिमले दुई–दुई विकेट लिए । मुबासिर खानले एक विकेट हात पारे ।
