कुटपिटमा संलग्न पूर्वप्रदेश सांसद पक्राउको विरोधमा एमालेद्वारा विरोध प्रदर्शन

मुगु। नेकपा एमालेले पूर्वप्रदेशसभा सदस्य दानसिंह परियार पक्राउ गरेको विरोधमा विरोध प्रदर्शन गरेको छ। पूर्वाधार विकास कार्यालय मुगुका निमित्त कार्यालय प्रमुख ईन्जिनियर दत्त बुढ्थापामाथि कुटपिट गरेको आरोपमा पूर्वप्रदेशसभा सदस्य परियारसहित पक्राउ परेको विषयमा एमालेले विरोध प्रदर्शन गरेको हो।

बुढ्थापामाथि कुटपिट गरेको आरोपमा पूर्वप्रदेश सांसद परियार र छायाँनाथरारा नगरपालिका वडा नं ६ का वडाध्यक्ष खेमबहादुर रावलविरुद्ध अभद्र व्यवहारसम्बन्धी आइतबार जिल्ला प्रशासन कार्यालयमा मुद्दा दर्ता भएको छ।

प्रहरीले शनिबार नै दुवै जनालाई पक्राउ गरेर कारबाही प्रक्रियाअघि बढाएपछि सोमबार रिहाइको माग राखेर एमाले मुगुका नगर ईन्चार्ज डम्बर बहादुर रावलको नेतृत्वमा जिल्ला प्रशासन कार्यालय मुगुमा विरोध प्रदर्शन गरेका हुन्।

परियारले शनिबार पूर्वाधार विकास कार्यालय प्रमुख बुढ्थापालाई सडक योजना सम्झौताअनुसार सबै रकम भुक्तानी नगरेको आरोप लगाएर कार्यालय हाताभित्रै पूर्वसांसद परियार र वडाध्यक्ष रावलले हातपात गरेका थिए।