काठमाडौँ। नेपाली कांग्रेस तथा नेकपा माओवादी केन्द्रका नेताहरुले शीर्ष तहको सहमतिबाट नेकपा एमाले पछि हटेको आरोप लगाएका छन्। आइतबार भएको प्रधानमन्त्री प्रचण्ड, एमाले अध्यक्ष केपी ओली र कांग्रेस सभापति शेरबहादुर देउवाबीचको छलफलमा संसद सुचारु गर्ने सहमति भए पनि सो सहमतिबाट एमाले पछि हटेको आरोप लगाएका हुन्।
सहमति अनुसार एमालेले संसदमा आफ्ना कुरा राख्ने र प्रधानमन्त्रीको स्पष्टीकरण सुन्ने सहमति भएको थियो। तर, उक्त सहमतिबाट एमाले पछि हटेपछि आजको बैठक स्थगित भएको माओवादी र कांग्रेसका नेताहरुले बताएका छन्।
शीर्ष नेतृत्वबीच संसद खुलाउनेबारे सहमति भए आइतबार दिउँसो ३ बजेको लागि तय भएको प्रतिनिधिसभाको बैठक सोमबारसम्मलाई स्थगित भएको छ। संसद् सचिवालयले सूचना टाँस गरी सोमबार ३ बजे बस्ने गरी आजको बैठक स्थगित भएको जनाएको छ।
कांग्रेसका प्रमुख सचेतक रमेश लेखकले पनि शीर्ष तहको सहमतिबाट एमाले पछि हटेपछि बैठक स्थगित भएको प्रतिक्रिया दिए।
त्यस्तै, माओवादी केन्द्रका प्रमुख सचेतक हितराज पाण्डेले पनि शीर्ष तहमा छलफलपछि प्रधानमन्त्रीले सम्बोधन गर्ने र सदन खुलाउने भने पनि फेरि कुरा नमिलेको बताए।
