काठमाडौँ । प्रधानमन्त्री पुष्पकमल दाहाल ‘प्रचण्ड’को अभिव्यक्तिप्रति आपत्ति जनाउँदै प्रमुख प्रतिपक्षी एमालेले संसदीय दल बैठक बोलाएको छ ।
आफूलाई प्रधानमन्त्री बनाउन सरदार प्रीतम सिंह पटक–पटक दिल्ली गएको भनी प्रधानमन्त्री प्रचण्डले दिएको अभिव्यक्तिप्रति एमालेले आपत्ति जनाएको हो ।
एमाले सचेतक महेश बर्तौलाका अनुसार आज (बुधबार) दिउँसो १ः३० बजे यसै अभिव्यक्तिलाई लिएर विरोध जनाउन एमालेको संसदीय दल बैठक ल्होत्से हलमा बस्दैछ ।
सचेतक बर्तौलाले भने – ‘प्रधानमन्त्रीको असमान्य अभिव्यक्तिले संसदमाथि अपमान भयो । नेपालको संविधान, मुलुकको सार्वभौमता र माथि अपमान गर्नुभयो । यसलाई एमालेले सामान्य ढंगले लिएको छैन । यसबारे एमालेले गंभीरताका साथ अगाडि बढाउँछ ।’
भारतको जम्मुबाट नेपाल आई व्यवसाय थालेका सरदार प्रीतम सिंहको पुस्तक विमोचन क्रममा प्रचण्डले आफूलाई प्रधानमन्त्री बनाउन सिंह पटक पटक दिल्ली गएको अभिव्यक्ति दिएका थिए ।
