काठमाडौँ। राष्ट्रिय स्वतन्त्र पार्टी (रास्वपा)का सभापति रवि लामिछानेले गठबन्धन सत्ता जोगाउन बनाएको दाबी गरेका छन्। आइतबार गोकर्णेश्वरको नगरभेलालाई सम्बोधन गर्दै उनले जनताका लागि नभई सत्ता जोगाउनका लागि गठबन्धन बनिरहेको बताएका हुन्।
लामिछानेले भने, ‘अहिले ठूला दलहरुले सत्ता जोगाउनका लागि गठबन्धन बनाइरहेका छन्। जनता जोगाउने गठबन्धन होइन, सत्ता जोगाउने गठबन्धन हो त्यो।’
सत्ता गठबन्धनमा आबद्ध संसदभित्रका माओवादी केन्द्र, जनता समाजवादी पार्टी र नेकपा एकीकृत समाजवादीले विप्लव नेतृत्वको नेकपालाई समेटेर समाजवादी मोर्चा नेपाल बनाएको छ। लामिछानेले यहि समाजवादी मोर्चालाई लक्षित गर्दै यस्तो बताएका हुन्।
उनले जनता आजपनि अस्पतालमा डाक्टरको पालो नपाएर महिनौं अपोइन्टमेन्ट नपाएर बसेको, विदेशमा अलपत्र परेर बसिरहेको अवस्थामा उनीहरुका लागि गठबन्धन गर्नुपर्नेमा गठबन्धनभित्र पनि अर्को गठबन्धन बनेको बताए।
