काठमाडौँ। प्रधानमन्त्री पुष्पकमल दाहाल प्रचण्डले देशको अर्थतन्त्र जागेको बताएका छन्। प्रतिनिधिसभाको बुधबारको बैठकमा बोल्दै प्रधानमन्त्री प्रचण्डले अर्थतन्त्र श्रीलंकाको बाटोमा रहेको भन्ने चिन्ताबीच अब अर्थतन्त्र सुधारको बाटोमा लागेको बताएका हुन्।
‘संसद्ले सरकारको नेतृत्व दिँदै गर्दा देश गम्भीर आर्थिक संकटमा थियो। एउटा भाष्य बनेको थियो आम रूपमा कि नेपालको नियति श्रीलंकाको जस्तै हुने भयो। यो भाष्य बौद्धिक वर्गमा मात्रै सीमित थिएन, आम नागरिकसम्म पुगेको थियो,’ प्रधानमन्त्री प्रचण्डले भने, ‘टीभी र मोबाइलका स्क्रिनहरूमा छाइरहेको श्रीलंकाको तस्बिरले देशलाई आशंकित र त्रसित बनाएको थियो। श्रीलंकाको दुःश्वप्नबाट जागिसकेको छ। यसबीचमा अर्थतन्त्र केही जागेको छ।’
प्रधानमन्त्री दाहालले अर्थतन्त्र जाग्नु सरकारको मात्रै नभई राष्ट्रकै उपलब्ध रहेको बताए। अर्थतन्त्रका सबै सूचक सकारात्मकतातर्फ अगाडि बढेको उनले बताए।
त्यस्तै, नेपाल विद्युत् प्राधिकारण र नेपाल आयल निगम नाफामा गएको उनको भनाई छ। उनले नेपाल वायु सेवा निगमको अवस्था पनि सुधारोन्मुख रहेको जानकारी दिए।
