काठमाडौँ। सत्तारुढ गठबन्धनमा रहेका नेकपा माओवादी केन्द्र, जनता समाजवादी पार्टी, नेकपा एकीकृत समाजवादी र संसद तथा बाहिर रहेको नेकपा कम्युनिस्ट पार्टी मिलेर समाजवादी मोर्चा घोषणा गरेका छन्। चार कम्युनिस्ट घटकहरूले राजनीतिक स्थिरता र परिवर्तनको रक्षाका लागि भन्दै चार पार्टीले मोर्चा घोषणा गरेका हुन्।
पार्टी एकतासम्मको उद्देश्य राखेर साझा प्रतिवद्धतामा रहेर समाजवादी मोर्चा घोषणा गरेका छन्। राष्ट्रिय सभा गृहमा भएको घोषणा सभामा माओवादी केन्द्रका अध्यक्ष एवं प्रधानमन्त्री पुष्पकमल दाहाल, नेकपा एकीकृत समाजवादीका अध्यक्ष माधवकुमार नेपाल, जनता समाजवादी पार्टीका अध्यक्ष उपेन्द्र यादव र नेपाल कम्युनिष्ट पार्टीका महासचिव नेत्रविक्रम चन्दले समाजवादी मोर्चा नेपालको सहमतिपत्रमा संयुक्त हस्ताक्षर गरे।
घोषणासभामा समझदारीपत्रमा हस्ताक्षर हुँदा सहभागी नेता कार्यकर्ताले मोर्चाको पक्षमा चर्को हुटिङ गरेका थिए। मोर्चाको नेतृत्व सहभागी दलहरुले आलोपालो गर्नेछन्। मोर्चाका घटक दलले मोर्चाको नीति तथा कार्यक्रम विपरित कुनै पनि गतिविधि नगर्ने घोषणा गरिएको छ। यस्तै अरु प्रगतिशील दलहरुलाई समावेश गर्दै जाने पनि घोषणा गरिएको छ।
मोर्चामा पूर्वप्रधानमन्त्री बाबुराम भट्टराईको नेसपा भने सहभागी भएन्। हेपिएको भन्दै भट्टराई अन्तिम समयमा सहभागी नभएको बताइएको छ।
