काठमाडौँ । प्रतिपक्षी दलहरूको बैठकमा सरकारमा भएका दलका नेताहरु पनि उपस्थित भएका छन् । शुक्रबार नयाँ बानेश्वरस्थित संसद् भवनमा बसेको विपक्षी दलहरूको बैठकमा लोकतान्त्रिक समाजवादी पार्टी (लोसपा) र नागरिक उन्मुक्ति पार्टी (नाउपा) पनि सहभागी भएको हो ।
बैठकमा लोसपा अध्यक्ष महन्थ ठाकुर र नाउपा अध्यक्ष रञ्जिता श्रेष्ठ पनि सहभागी भएका हुन् । लोसपा र नाउपा दुवै वर्तमान सरकारमा सहभागी छन् ।
प्रतिपक्षी दलहरूको बैठकले बाढीपहिरोमा सरकारले गरेको ढिलासुस्तीबारे प्रश्न गर्दै आगामी कात्तिक ५ गते सरकारलाई ज्ञापन पत्र बुझाउने निर्णय गरेको छ ।
बैठकमा नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, नेकपा एकीकृत समाजवादी, लोसपा, नाउपा, आम जनता पार्टीका शीर्ष नेता पनि सहभागी थिए ।
