हेटौँडा । बागमती प्रदेशका मुख्यमन्त्री बहादुरसिंह लामाले प्रदेशसभाबाट विश्वासका पाएका छन् । मुख्यमन्त्री भएको ३० दिनभित्र प्रदेशसभाबाट विश्वासको मत लिनुपर्ने संवैधानिक व्यवस्थाअनुसार आजको प्रदेशसभा बैठकमा विश्वासको मत मागेका थिए ।
मंगलबार नेपालको संविधानको धारा १६८ को उपधारा ४ तथा प्रदेशसभा नियमावली २०७४ को नियम १४३ को उपनियम ४ बमोजिम मुख्यमन्त्री लामाले विश्वासको मत पाएका हुन् । विश्वासको मतको पक्षमा ६४ मत परेको थियो भने विपक्षमा ३५ मत परेको थियो ।
नेपाल मजदूर किसान पार्टीले तटस्थ बस्ने घोषणा गरेको थियो । प्रदेश सभामा विश्वासको मत माग्दै मुख्यमन्त्री लामाले स्थिर सरकार बनाएर जनताको अपेक्षा पूरा गर्नु आजको आवश्यकता भएको बताएका थिए । उनले विगतका सरकारले थालनी गरेका राम्रा कामहरुलाई निरन्तरता दिने भन्दै विश्वासको मत दिन माओवादी र एकीकृत समाजवादीसँग आग्रह गरेका थिए ।
विश्वासको मतमाथिको छलफलमा बोल्दै नेपाली कांग्रेसका नेता रामकृष्ण चित्रकारले साना दलहरुको उग्र महत्वाकांक्षाका कारण कांग्रेस–एमालेको पछिल्लो राजनीतिक समीकरण बनाउनुपरेको बताए । यस्तै नेकपा एमालेका नेता जगन्नाथ थपलियाले समयको माग अनुसार संविधान परिमार्जनको आवश्यकतालाई सम्बोधन गर्नका लागि नयाँ गठबन्धन बनेको उल्लेख गरे ।
छलफलमा सहभागी हुँदै नेकपा माओवादीका नेता युवराज दुलालले संविधान संशोधन संसदको अंकगणितले नभई राष्ट्रिय आवश्यकताले निर्धारण हुने बताएका थिए । बिहानीले दिनको संकेत गर्छ भन्दै दुलालले मुख्यमन्त्रीलाई प्रश्न गरे, ‘मन्त्रीको हिसाबकिताब मिलाउन सक्नुभएको छैन, यो सरकार अगाडि जान्छ भनेर कसरी बुझ्ने ? ।’
