काठमाडौँ । सभामुख देवराज घिमिरेले सांसदहरूले प्रतिनिधि सभामा उठाएका विषयप्रति सरकारको ध्यानाकर्षण गराएका छन् ।
आज बसेको प्रतिनिधि सभा बैठकमा सभामुख देवराज घिमिरेले शून्य, आकस्मिक र विशेष समयमा सांसदहरूले उठाएका विषयप्रति सरकारको ध्यानाकर्षण गराएका हुन् । प्रतिनिधि सभाको आजको बैठकमा सांसदहरूले प्रधानमन्त्रीको भारत र राष्ट्रपतिको विदेश भ्रमणबारे सदनलाई जानकारी गराउन सभामुखको रुलिङसहित प्राकृतिक विपत्ति र यसबाट भइरहेको क्षति तथा सरकारले क्षति घटाउन गरिरहेका कामलगायत विभिन्न विषयमा चासो राखेका हुन् ।
प्रमुख प्रतिपक्ष दल नेपाली कांग्रेसले प्रधानमन्त्री पुष्पकमल दाहाल प्रचण्डको भारत भ्रमण र राष्ट्रपति रामचन्द्र पौडेलको विदेश भ्रमणको विषयमा सदनलाई जानकारी नदिएको भन्दै असन्तुष्टि जनाएको छ ।
प्रतिनिधि सभा बैठकको आकस्मिक समयमा बोल्दै प्रमुख सचेतक रमेश लेखकले राष्ट्रपति र प्रधानमन्त्रीको विदेश भ्रमणबारे सदनलाई जानकारी गराउन माग गरे । उनले प्रधानमन्त्री भारत भ्रमणमा जानुअघि सदनलाई जानकारी नगराएको भन्दै आपत्ति जनाए । उनले सदनको नेता प्रधानमन्त्री भए पनि उनी सदनबाट भाग्न खाजेको आरोपसमेत लगाए ।
भारत भ्रमणबाट फर्केको एक हप्ता हुँदा पनि सदनले प्रधानमन्त्री भारत भ्रमणमा गएको र फर्किएको विषयमा अखबार पढेर थाहा पाउनुपर्ने दुर्भाग्यपूर्ण अवस्था भएको नेता लेखकको भनाइ छ । उनले उपप्रधान एवम् गृहमन्त्री रवि लामिछानेले सदनमा कांग्रेस नेताहरूमाथि लगाएका आरोपबारे पनि प्रधानमन्त्रीबाट जवाफ माग गरे । नेपाली कांग्रेसका सांसद अर्जुननरसिंह केसीले मनसुनजन्य जोखिम न्यूनीकरणका लागि आवश्यक तयारी तत्कालै गर्न माग गरेका छन् ।
प्रतिनिधि सभा बैठकको विशेष समयमा सदस्य योगेश भट्टराईले पहाडी र हिमाली जिल्ला प्राकृतिक विपत्तिको उच्च जोखिममा भएको भन्दै सुरक्षाका लागि एकीकृत बस्ती विकासको कार्यक्रम ल्याउनुपर्ने बताए । उनले विपद् प्राधिकरणलाई स्रोत, साधन र जनशक्तिको अभाव हुन नहुनेमा जोड दिए ।
त्यस्तै नेपाल मजदुर किसान पार्टीका सांसद प्रेम सुवालले काठमाडौँमा मेलम्चीको पानीले नपुग्ने, लार्के तथा याङ्ग्रीको पानी तत्काल ल्याउन सक्ने अवस्था नहुँदा काठमाडौँवासीले खानेपानीको चरम अभाव भोग्नुपरेकोतर्फ सरकारको ध्यान पुग्न नसकेको टिप्पणी गरे ।
