काठमाडौँ । जनता समाजवादी पार्टी नेपालको पदाधिकारी चुनावबाट नभइ सहमतीय आधारमा गर्ने भएको छ ।
बिहीबार मध्यान्ह चुनाव गर्ने कार्यतालिका थियो । तर, केहीबेरअघि अध्यक्ष उपेन्द्र यादवले चुनावी प्रक्रिया स्थगित गरी सहमतीय आधारमा नेतृत्व चयन गर्ने प्रक्रिया स्थगित गराएका हुन् । सोही अनुसार बुधबार १९ पदाधिकारीका लागि ७५ जनाको उम्मेदवारी मनोनयन भएको थियो । जसपा नेपालको ११३५ प्रतिनिधि सहभागी छन् ।
चुनाव गर्ने भनेपछि उम्मेदवारहरुले महाधिवेशनस्थल धनुषामा व्यापक प्रचार–प्रसार गरेका थिए । तर, चुनाव सुरु हुनु केहीबेरअघि मात्र यो प्रक्रियाबाट उपेन्द्र पछि हटेका छ्न् । अन्य कसैको उम्मेदवारी नपरेपछि उनी बुधबार नै अध्यक्षमा निर्विरोध निर्वाचित भइसकेका छन् । तर, उपाध्यक्ष, महासचिव, उपमहासचिव, सचिव र कोषाध्यक्षमा तीव्र प्रतिस्पर्धा देखिएको थियो ।
भोटिङ गर्ने प्रक्रियामा नगएर सहमतिबाट निर्णय गर्ने निर्णय भएपछि अहिले उपेन्द्रले आफूसहितको टीम बनाइरहेका छन् । त्यसले १९ पदाधिकारीसहित २०१ केन्द्रीय सदस्य चयन गर्न सहमती जुटाउनेछ ।
