काठमाडौँ। प्रधानमन्त्री पुष्पकमल दाहाल प्रचण्डले सरकार दुनियाँभर आर्थिक सहयोगको भिख माग्ने अवस्थामा हुनु विडम्बना भएको बताएका छन्। शुक्रबार पार्टीको रिटर्नी सेन्टर नेपालको प्रथम राष्ट्रिय भेलालाई सम्बोधन गर्दै प्रधानमन्त्री प्रचण्डले सो कुरा बताएका हुन्।
देशमै प्रचुर सम्भावना भएपनि विदेशीसँग भिख माग्नु दुर्भाग्यको कुरा भएको उनको भनाई छ। नेपाल आफैमा सुनको कचौरा जस्तो भएपनि अरुसँग भिख माग्दै हिँड्ने गरेको प्रधानमन्त्री प्रचण्डको टिप्पणी छ।
‘नेपाल प्रकृतिले दिएको साधन स्रोतका दृष्टिकोणले गरिब विल्कुल छैनौँ। प्रकृतिले दिएको कुरा भन्ने हो भने तराई मधेसदेखि पहाड, हिमालसम्म विविधता त्यसको उत्पादकत्व र स्रोतहरूको दृष्टिकोणले धेरै धनी छौँ। तपाईँहरूले सुन्नु भएको होला विदेशका कयौँ बौद्धिक अर्थशास्त्रीहरूले नेपाल सुनको कचौरा लिएर भिख मागेर हिँडेको छ भन्ने गर्छन्,’ प्रधानमन्त्रीले भने, ‘नेपाल आफैमा सुनको कचौरा जस्तो छ। हामी दुनियाभरि रोजी रोटीको निम्ति जान बाध्य छौँ। सरकार दुनियाँभर आर्थिक सहयोगको भिख माग्ने अवस्था छ। यो एउटा विडम्बना हो। नेपाल र नेपालीका निम्ति दुर्भाग्यको कुरा हो।’
हामी यस्तो किन भयौँ भनेर प्रश्न वा गहिरो गरी घोत्लिनु पर्ने उनको भनाई छ। हाम्रो इतिहास र विरासत यस्तो नभएको भन्दै प्रचण्डले भने, ‘अरू ठुला देशहरू वैदेशिक हस्तक्षेपको बुटमुनी कुल्चिदा हामी स्वतन्त्र भएको इतिहास छ। वीरता र बलिदानको दृष्टिकोणले हेर्ने हो भने नेपालीहरू विश्वभर ख्याति कमाएका हौँ।’
