काठमाडौँ । नेपाली कांग्रेसका महामन्त्री विश्वप्रकाश शर्माले गृहमन्त्री रवि लामिछानेलाई गिरीबन्धु टी–स्टेटको फाइल खोलेर देखाउन च्यालेन्ज गरेका छन् ।
बिहीबार बसेको प्रतिनिधिसभा बैठकमा बोल्दै उनले गिरीबन्धु टिस्टेटको जग्गा प्रकरणको विषयमा एमालेका अध्यक्ष केपी शर्मा ओलीले कांग्रेसलाई आरोप लगाएको विषय उठान गर्दै उक्त जग्गा प्रकरणको फाइल खोलेर देखाउन च्यालेन्ज गरेका हुन् ।
‘म गृहमन्त्रीलाई खोज्न चाहन्छु । सत्ता गठबन्धनको सबैभन्दा ठूलो दलको अध्यक्षले कांग्रेसले बेचेर ७० बिघाको कमिसन खायो भनेर जे आरोप लगाउनुभएको छ त्यसमाथि अनुसन्धान गरेर कांग्रेसलाई दण्डित गर्नको लागि गिरीबन्धुको फाइल खोल्न तपाईं तयार हुनुहुन्छ ?,’ उनले भने ।
सांसद शर्माले गिरीबन्धुको फाइल खोल्न मात्रै होइन गृहमन्त्री केपी ओलीसँग बोल्न समेत डराउने टिप्प्णी गरे ।
उनले भने, ‘उहाँ खोल्न होइन, बोल्न पनि सक्नुहुन्न । बोल्न सक्ने भए शिक्षामन्त्रीउपरको शब्द फिर्ता लिनुस् भन्न उहाँले सक्नुपर्थ्यो । नम्रतापूर्वक पनि भन्न सक्नुभएन ।’
त्यस्तै, उनले अदालतबाट निर्दोष प्रमाणित भइसकेका सन्दीप लामिछानेले टी– २० विश्वकप खेल्न नपाउनु सरकारको कमजोरी भएको टिप्पणी गरे ।
