काठमाडौँ । नेकपा एमालेका सांसद योगेश भट्टराईले झापामा रहेको गिरिबन्धु टी–स्टेट प्रकरणमा नियोजित ढंगले कांग्रेसले मुद्दा उठाउन खोजेको आरोप लगाएको छ । मंगलबार प्रतिनिधिसभा बैठकमा बोल्दै सांसद भट्टराईले गिरिबन्धु टीको विषयलाई उठाएर कांग्रेसले पार्टी र पार्टी अध्यक्ष केपी शर्मा ओलीमाथि नियोजित ढंगले षडयन्त्र गरेको आरोप लगाए ।
कांग्रेसले गिरिबन्धु टि स्टेटमा नीतिगत भ्रष्टाचार भएको भन्दै छानबिनको माग गर्दै आएको छ । नेता भट्टराईले जुनसुकै कालखण्डका विषयमा छानबिन गर्न एमाले तयार रहेको जिकिर गरे ।
‘आज गिरिबन्धुको कुरा उठाइएको । यसमा हामीलाई केही आपत्ती छैन । सर्वोच्च अदालतको आदेशअनुसार संसदले कानुन बनायो । कानुन कार्यान्वयनका क्रममा भएका कमीकमजोरीलाई अदालतले केही कुरा औंल्याएको छ । त्यस कुराको हामी सम्मान गर्छौं,’ उनले भने, ‘हाम्रो पार्टीमाथि, हाम्रो अध्यक्षमाथि नियोजित ढंगले हस्तक्षेप, प्रचार गर्ने, आरोप लगाउने खालको जुन खालका षडयन्त्र भएका छन् । म भन्न चाहन्छु २०४६ सालपछि अथवा अगाडि कुनकुन बेलाको छानबिन गर्नुपर्ने हो । एनसेलको गर्ने हो कि ,टेरामिक्सको गर्ने हो कि, बालुवाटार जग्गाको गर्ने हो । कहाँ कहाँको गर्ने हो । प्रत्येक छानबिनका लागि नेकपा एमाले तयार छ ।’
