केपी ओलीमाथि भएको आक्रमणबारे एमालेले माग्यो सरकारसँग जवाफ

काठमाडौँ। नेकपा एमालेका सांसद योगेश भट्टराईले आफ्ना पार्टीका नेतामाथि भएको आक्रमणबारे सरकारसँग जवाफ मागेका छन्। शुक्रबारको प्रतिनिधिसभा बैठकमा बोल्दै सांसद भट्टराईले आफ्ना नेतामाथि सांघातिक आक्रमण हुँदा समेत सरकार मौन रहेको भन्दै आपत्ति जनाएका हुन्।

उनले कोशी प्रदेश नामाकरणको विरोधमा आन्दोलनरत पहिचानवादीहरूको प्रदर्शनमा आफ्ना नेताहरूमाथि आक्रमणको प्रयास भएको भन्दै गृहमन्त्रीको जवाफ मागेका छन्। उनले भने, ‘केही महिनाअघि पार्टीका अध्यक्ष केपी शर्मा ओली, संसदीय दलका उपनेता सुवास नेम्बाङलगायतको टोलीमाथि आक्रमण भयो। अवरोध सृजना भयो। कालो झन्डा देखाइयो। बाटोमा एम्बुस पनि थापिएको थियो। तर सो घटनाबारे सरकारबाट केही जानकारी आएन। यस्तो किन भइरहेको छ?’

उनले बिहीबार इलाममा र उदयपुरमा आफ्ना नेतामाथि आक्रमणको प्रयास भएको बताए।

आफ्ना नेतालाई निशाना बनाउँदै पटक पटक आक्रमण हुँदा पनि सरकारले सुरक्षा दिन नसकेको बताए। राज्यले आफ्ना नेता कार्यकर्ताको सुरक्षा दिन नसके एमाले आफै आफ्ना नेता तथा कार्यकताको सुरक्षा गर्न सक्षम रहेको उनको भनाइ छ।